Tin biaha e receta pa exito ta mas simpel cu nos ta pensa. Lanta cu humildad, duna balor na tur loke ta bin den bo caminda, aprecia esaki, nunca stop di siña ni tampoco para di kere den bo mes. E receta aki ta conclui facilmente ken Jordan Orman (25) ta awe, conoci como un di e Aruba su top barbero cu apenas 25 aña na cabes di su barberia JWorlds Barber Studio. Un logro cu ta pone lus riba dje pa inspira otro pa briya como un GOAL DIGGER.
BARBERIA, E DESCUBRIMENTO
Jordan ta corda cu su prome hobby como mucha tabata e arte di pintamento, algo cu toch si mira bek, e ta aplica den su trabou como un barbero dirigiendo su mesun barbershop awendia. Pero barberia ta algo cu e no a mira mes den su bida, sino te na mas grandi. “Nunca mi a pensa cu mi lo bira un barbero paso e tabata algo cu mi no tabatin interes den dje, mi mente tabata na otro cosnan”. Sinembargo Jordan su atencion a cuminsa cambia den e direccion aki, danki na e influencia di e profesion aki den su famia. Su dos rumannan y un sobrino ta haci e trabou aki pa un tempo caba. “Mi ta corda cu e prome biaha cu mi a ‘give it a try’ na corta cabey, mi a gusta masha hopi mes, aunke mi no tabata bon den dje. Pero mi ta un persona cu ta keda persisti te ora mi logra”. Asina Jordan a siña perfecciona e arte aki cual awe a dune su mesun negoshi cu a crea fama hopi liher. Mi ta gradici Dios cu mi por a descubri mi talento, mi don den kico mi por ta bon den dje y ta gusta haci. No tin nada mihor cu tin un trabou cu bo no ta mire djis como un trabou sino como bo pasion”.
