Tur caminda bo ta wak e, riba su scooter cu su helm bisti, semper c’un sonrisa riba su cara na caminda pa piki un auto pa laba. For di chikito auto tabata su pasion y tumando esey na cuenta el a crea un negoshi na unda semper e lo ta trahando cu auto. Tin un dicho ta bisa: “haci locual bo ta gusta y lo bo no mester traha niun dia den bo bida”. Esaki ta con Jerusho Ricardo Fernandez a logra haci e dicho ey un realidad!
Jerusho ta pensa cu si bo lo ta apto pa traha mas cu 8 ora, drumi poco, traha sin wordo paga na cuminsamento, traha sin tin vakantie, lanta tur dia cu e mes un pasion pa bo trabou sin importa e desafionan, tuma tur sorto di critica, ta humilde y siña di bo fout, tin un actitud di mente habri y positivo y tuma risico, lo bo ta exitoso den cualkier negoshi. Cu e ingredientenan aki bo lo por ta un empresario exitoso. Hopi empresario gusta pone cos agradabel y positivo so ora ta trata di nan negoshi, pero e ta tuma perservencia, sacrificio y dedicacion pa logra bo metanan.
“E compensacion y satisfaccion cu bo ta haña ora hende nan ta bin bek bo negoshi y haci uso di bo servicionan ta indescribibel”
