PAKICO NAN TA RESALTA?
Hunto, Edjean y Arthur ta pioneronan den empoderacion di Cultura 2023 cu nan fundacion GO CULTURA, nan ta sobresali na 2023 mas ainda, pa nan labor excepcional den promove y apoya arte y cultura na Aruba. Hunto cu nan plan actual pa cuminsa yega na data pa explora e posibilidad nan fructifero pa tanto artista como Aruba, nos ta mira accion serio porfin riba e tereno aki.
Meta & Vision
“E meta di GO CULTURA ta pa crea mas plataforma y oportunidad pa e industria creativo di Aruba. Nos ta sinti cu e sector aki mester keda comprendi y mester di e sosten di comunidad, comercio y e mesun gobierno pa logra esaki”. Eventonan grandi manera reconocemento di Etty Toppenberg, Maybeline Arends-Croes, Jossy Brokke y e mas recien di Robert J’eandor cu e reconocemento Crioyo di Oro, tur ta proyectonan pensa, organisa y ehecuta pa GO CULTURA.
GO CULTURA ta logra ehecuta e evento den un forma asina bunita, cu e spectador lo no pensa e dificultadnan cu nan ta topa cune hopi biaha, manera e falta di fondo y /of sosten pa logra haci cada un di e eventonan aki. Esaki ta loke precisamente mas y mas, Edjean y Arthur kier logra cu nan fundacion, pues pa tur instancia cuminsa compronde y mira e potencial cu nos cultura ta ofrece. E modelo aki ta uno exitosamente ehecuta na paisnan manera Colombia y Barbados, unda Edjean y Arthur a bay pa mira con nan a logra haci esaki.
Por lesa mas di nan entrevista den nos edicion digital, tanto den Papiamento como na Ingles.
