E dia cu tur cos a cambia: Alexander Tejada & Leoman Sanchez 

Awe sinta na cas contrario na nan dianan normal cu lo tabatin ambos trahando den nan salon di beyesa Hair Factory, tanto Alexander (Alex) y Leoman (Leo) ainda no por kere con leu e pandemia di Covid-19 ta afectando Aruba. Aunke nan a mira esaki ta bin, nunca nan por a imagina e magnitud actual.

Alex ta corda tempo cu al e cuminsa cu su mesun beauty salon; “Mi tabatin un tempo ta traha na un otro beauty salon, pero pa motibo cu mi kier a sigui crece mi a dicidi cu tabata momento pa mi habri mi mesun beauty salon. E demanda tabata halto y mi tin cu bisa cu di berdad, e temponan ey tabata temponan bon”. Den e ultimo 6 añanan Leoman Sanchez, Leo, a join e team y asina e salon a sigui crece te yega na opera cu 6 persona. Mayoria di e clientenan ta local, aunke tin un parti chikito cu ta turistanan tambe.

Apenas 2020 a habri cu Alex y Leo ta corda e prome noticianan cu nan a cuminsa tuma nota di dje cu tabata papia di un virus. “Desde e momento ey caba nos a cuminsa reforsa tur tipo di protocolonan cu tabatin manera laba man constantemente. Berdad ta cu sentimentalmente e tabata afecta nos pasobra nos no por a cuminda nos clientenan cu sunchi y brasa pero nos a cuminsa mantene distancia pa proteha salud di nos clientenan y di nos mes”, Leo ta conta. Ambos ta admiti cu nan a realisa hopi trempan cu e virus aki lo trece consecuencia pa nan negoshi, pero nunca di e forma actual.“Mi ta kere cu nos ta sigur den e grupo di esunnan di comercio mas afecta, ya cu e contacto cu nos clientenan ta directo.

Tabata 12 di maart, e dia cu e duo aki a sera nan porta forsa pa e menasante virus di Covid-19. “E seramento di e negoshi tabata mortal y hopi duro mes. Mi mester a bisa tur e trahadornan cu nos mester bay cas sin pago y pa nos carga pasenshi y confia den Dios. Mi a bisanan pa nos spera ki solucion gobierno lo trece pa nos, pero nos ta hopi conciente cu e mihor solucion ta esun cu Dios ta dunando nos, cu ta pa por ta na bida y tin salud. Nos a paga tur e lusnan di e negoshi cu awa na wowo, hopi sentimentonan y na mesun momento preocupa puntrando nos mes kico lo pasa of kico lo bay bin pa nos. Lamentabelmente, nos a sera nos salon net den e momentonan cu nos tabata haciendo diferente cambionan den e imagen y remodelando pa por a duna mihor servicio”.

Nos ta conciente cu e futuro pa Hair Factory lo ta uno hopi lento, pero semper nos lo tin e mihor disposicion y mente positivo cu tur esaki lo pasa y hunto manera e equipo cu nos ta, nos lo traha propuestanan nobo pa yuda cu nos clientenan por keda atendi. Nos lo tin mihor prijsnan pero semper cu e mesun calidad di trabou y trahadornan.

“Hopi cos mes, pero e cos mas importante ta e hygiene personal y tambe pa realisa cu aunke nos wak cu cosnan por ta dificil y scur semper lo tin un speransa. Mas cu nada e situashon aki a traha riba nos fe y creencia den Dios. Tambe e crisis aki a yuda encontra cu nos hogar y descubri cu nos tin hopi cosnan pa haci y comparti den pareha. Apesar di con duro no mes por ta pasando, semper nos lo tin di yuda nos prohimo cu por ta pasando peor cu nos mes.

E reflexion di mas grandi ta cu nos ta laga di disfruta momentonan banda di otro y cu nunca nos ta disfruta di e personanan cu ta rond di nos. Tambe cu nos mester laga e odio, rabia y envidia y hopi mas cu hopi estilistanan tin riba otro. Ta momento pa ta uni den oracion y apoya nos mes y busca e manera pa solo briya bek pa nos tur pa nos sali bay dilanti.

Na nos clientenan: keda cas y cuida pa esaki por pasa pronto. Semper boso por tin confiansa y puntra nos si tin algun inkietud pa loke ta trata un tiña of productonan cu lo por yudabo na bo mesun cas. No wak videonan cu por ta un riesgo pa bo cabey. Tene pasenshi y kere cu pronto nos lo atende boso bek. No tuma riesgo di bay haci bo cabey/huña serca personanan cu no conocebo y cu bo no sa ki tipo di productonan ta usando.

Na nos amigonan, estilistanan y comercio: ban tin pasenshi cu tur cos lo pasa. Keda cas, y ban purba yuda otro. Confia cu semper Dios lo yuda nos y nos lo por haya un solucion pa tur cos despues cu esaki pasa. E parti mas importante ta pa nos tin salud.

Nomber Completo: Alexander Tejada & Leoman Sanchez 

Negoshi: Hair factory Beauty Salon 

Tempo cu a cuminsa cu e negoshi: 2014