Covid-19 a plama rond mundo di un manera alarmante y ningun hende tabata prepara pa un evento asina, esaki ta e caso di Yohana & Freddy, un pareha di emprendedor propietario di un Guesthouse yama Solar Villa. Na 2014 nan a dicidi pa busca independencia economico y cu nan por a haci’e for di cas, pa di e manera ey nan por a pasa mas tempo cu nan yiunan. Tur dos tabatin experiencia den mundo di hospitalidad y esaki ta loke a motivanan pa aventura nan mes pa start-up un negoshi na cas. Nan a cuminsa cu 2 camber pero e demanda a bira asina halto cu poco poco nan a expande te na 6 camber. “Inicialmente nos mercado tabata turista di Venezuela, despues nos a cuminsa haya turista Mericano di timeshare cu kier a extende nan estadia of cu tabata haya vuelo mas economico riba e dianan prome of despues di nan siman di timeshare. Despues nos mercado a expande y nos tabata haya turista di diferente pais di mundo. Nos tin guestnan repetitivo cu a bira amigonan di famia. Algun di nan a yega di bin pa 6 biaha caba”.
COVID-19
“Ora nos a scucha di Covid 19 pa prome biaha tabata na December 2019. Pero nos no tabata sigur si e noticia tabata berdadero”. Aunke cu Januari tabata un bon luna pa Solar Villa, e pronostico pa e lunanan venidero tabata preocupante y no a descarta cu esaki lo por tin efectonan riba nan negoshi. “Februari a drenta cu confirmacion di Corona Virus y lockdown di ciudadnan na China y casonan na Europa. Nos preocupacion y afirmacion di e efectonan cu esaki lo tin riba nos negoshi a bira realidad. Februari a cai hopi den ocupacion compara cu otro lunanan y reservanan nobo no a sigui drenta tampoco”.
Cancelacionnan tabata drenta par di dia prome cu e yegada di e bishitantenan y mayoria di nan a informa cu nan lo cambia nan fecha di viahe. “E despedida di e ultimo ‘guest in house’ tabata uno cu hopi incertidumbre y cu e miho deseonan. Tabata un pareha cu a bin di un ciudad den norte di Italia. Nan tabatin nan ticket cu KLM pa Amsterdam pero no tabata sigur di con lo yega nan pais bek door di e lockdown cu a keda imponi un par di dia atras. Esey tabata dia 17 di maart”.
![](https://xclusivomagazine.com/wp-content/uploads/2020/04/IMG-20200416-WA0021.jpg)
Yohana: “Mi a yora un dia di mira e cantidad di persona cu tabata fayece tur dia na Italia y despues na Spaña. Mi no por a kere cu esaki ta por ta pasando. Mi a resa pa pidi nos Creador pa yuda nos den e momentonan dificil aki. Solar Villa no tin trahador. Pero nos a sinta papia nos dos y delibera kico e posibel scenarionan lo ta, nos a premira cu kico ta pasando actualmente lo tabata inevitabel, dus e lockdown y caida di turismo. Esaki a yuda nos un tiki paso nos a logra prepara psicologicamente.
OPORTUNIDAD
E situashon aki a habri nos wowo pa un realidad cu nos ta papiando riba dje pa hopi aña na Aruba, nos isla mester diversifica su economia y nos a haya nos confronta cu e esaki first hand. Nos a cuminsa c’un proyecto nobo di desaroyo di apps pa negoshi. Nos a traha un app cu yama “Trece Pa Mi”, cu ta un portfolio di tur e negoshinan na Aruba cu ta haci delivery y ta publica tur nan detaye y producto nan. E usuarionan di e app por haci pedido online. Tambe nos ta trahando un app pa Johnson’s Supermarket pa haci order online y deliver esaki pa cliente sin sali fey cas. Pa Aruba completo, nos ta mira un oportunidad pa cuminsa separa residuonan organico for di otro sushi di cas y esaki nan por wordo converti den compost. Esaki ta algo cu tur hende por haci na nan cas awo cu tin tempo y tin interes pa planta. Of ta algo cu algun compania lo por haci na gran escala.
![](https://xclusivomagazine.com/wp-content/uploads/2020/04/7e75532d-a9a4-4793-8ead-1f7c7a045cd4.jpg)
CONSEHO
No desespera, purba di tuma decision nan di un manera calmo, cuminsa spaar pa crea un fondo di emergencia pa futuro y sea creativo. Purba di diversifica bo entrada. Usa e tempo cu tin disponibel awo pa pensa con pa mehora bo producto y siña skills nan nobo cu por beneficia abo y bo negoshi.