PAKICO POLITICA
Carlos ta splica cu el a drenta politica cu dos causa principal. E prome ta pa cambia nos sistema democratico pa uno cu tin miho control y mas influencia pa ciudadanonan. “Mi a wak y experiencia di leu y di serca con nos sistema democratico ta fayando nos, y esaki ta afecta decisionnan gubernamental den tur area di gobernacion, sea ta enseñansa, cuido medico, economia, nos mercado laboral, impuesto, medio ambiente, imigracion y mas”.
E ta splica cu nos sistema parlamentario ta crea un conflicto di interes cu pa decadanan caba ta stroba un control debido den gobernacion y cu ta tempo pa adresa e problemanan fundamental aki. “Tambe mi kier contribui na un gobernacion cu ta pone e prioridadnan unda nan mester ta, sin importa si e ta bay contra interesnan partidista”. Aruba tin hopi potencial cu nos por realisa ora nos pone nos prioridadnan unda nan mester ta.
Analisando e opcionnan pa realisa e causanan aki, el a conclui cu e manera mas efectivo ta pa postula su mes como un candidato y traha hunto pa logra e vision.
ESCOHENCIA PA PLATAFORMA RAIZ
“Mi ta alinea cu e ideologio social democrata progresivo di RAIZ”. Loke Aruba y mundo ta experencia actualmente a demostra e balor di e ideologia aki mas ainda y RAIZ tin e plannan pa ehecuta e esencia di e ideologia na un manera efectivo y progresivo. Proteccion di naturalesa tambe ta importante pa Carlos y RAIZ a prioritisa esaki desde su inicio. “Nos tin un tremendo team cu lo sa di ehecuta nos perspectivanan, y mi ta contento di forma parti di e team aki”.
Carlos ta enfoca hopi riba contenido, y e ta tuma tempo pa splica votadornan kico e kier realisa, pakico, y con.
