Aña 2022 a keda marca positivamente pa Aruba su conocido Love Coach Desiree Swaen cu publicacion di su buki titula; CONFESSIONS TO A LOVE COACH. “E tabata un proyecto di 5 aña cu hopi revision y detaye”, e ta conta. E buki di 128 pagina ta relata storia di 12 persona di Aruba, tanto homber como hende muher, di experiencianan hopi personal den nan bida amoroso y intimo. Cada persona a duna Desiree e autorisacion pa conta nan storia, den un formato di anominato, den e buki.
12 PERSONA CU CORAHE
“E no ta facil pa hende papia di nan sexualidad of momentonan intimo, sea positvo of negativo. Mi ta mira cu hopi hende riba 60 aña tin dificultdad pa haci esaki. Muher y hombernan di 50 bay abou si ta papia un poco mas mientras hobennan di 20 aña bay ariba, ta papia, den luho y detaye, sin laga nada afor.” Loke Desiree a ripara tambe ta cu hopi hende homber cu tin problema den nan intimidad, no ta mucho habri pa busca ayudo.
E topiconan mas resaltante den e buki ta infidelidad, abuso, aborto, narcisimo, ghosting y mas. “Mi ta keda bisa cu, falta di comunicacion ta loke hopi biaha ta hiba na e problemanan aki, Pues ora un hende no ta sinti su mes pa habri pa papia cu nan pareha y asina yuda su mes cu e problemanan cu e por ta pasando aden. Hopi ta prefera di confesa na una amiga of ta keda biba cu e problema.”
Por lesa mas di Desiree su entrevista den nos edicion digital, tanto den Papiamento como na Ingles.
