Robert “Bobby” Bryden Gibson ta landando pa 9 aña caba; el a cuminsa landa na 2013 na St Maarten pa Carib Swim Team eynan. Ora cu el a muda cu su famia pa Aruba, el a cambia di team pa Aruba Dolphins. Kizas e amor pa awa cu Bobby tin ta e hecho cu e ta e prome water born baby cu a nace den un birthing tub na Aruba. “Mi ta kere cu como cu mi a nace den awa, mi ta stima esaki asina hopi. Ya cu mi 3 aña, mi por a landa sin ayudo y por a hunga trankil den pool y na beach.”
Su entrenamento den e deporte di landamento ta casi tur dia, sea den pool of lama, pa por lo menos 2 ora largo. “Mi a yega di viaha pa competi na Corsou y Santo Domingo.”
Bobby mes ta bisa cu su presentacion na Corsou tabata excelente mientras esun na St. Domingo no tabata loke e tabata desea. Esaki ta como cu e tabata malo y poco for di condicion prome cu esaki.
FUTURO
‘Sigur lo mi kier sigui pa resto di mi bida cu mi carera di landamento tanto den pool como den lama grandi. Pa loke ta e direccion di mi landamento mes; mi lo kier participa den eventonan acuatico internacional, representando Aruba cu mi meta principal, di logra haya un scholarship pa un universidad. Un meta mas cortico ta cu lo mi kier logra keda nomina pa e FINA Scholarship, e mesun cu Britta Schwengle a haya, cual a yud’e biba y entrena cu e Azura Aquatics Swim Team, na Florida. Mi ta den proceso pa bay Merca pa participa den un competencia y entrena pa 2 luna awor. Esaki y viahenan futuro ta danki cu mi ta atende un bon sistema di educacion online cu tin nivel halto academicamente y tin flexibilidad cu ta dunami hopi libertad y e balance cu mi mester den mi deporte.
E deporte di landamento a dunami hopi experiencianan positivo como tambe aspectonan di bida. Mi a haya hopi amigonan como tambe coneccionnan solido. Mi a siña abilidadnan importante den bida manera disciplina y compromiso. Kizas e parti mas importante ta cu landamento a haci mi bira un mihor estudiante dunando mi incentivonan y metanan, hunto cu otro aspectonan positivo.
Por lesa mas di Bobby su entrevista den nos edicion digital, tanto den Papiamento como na Ingles.
