KEN E TA?
André (40) a lanta den e bario di Dakota den sercania di e famia di parti di su Tata. Un nucleo di famia chikito di 4 cu un ruman mayor. “Nos famia tabata considera un clase medio cu ambos di mi mayornan a labora henter nan bida cual a duna nos e ehempel cu den bida bo tin di traha duro pa logra tur locual bo kier den bida pero sin lubida di yuda otro.” Su trayectoria escolar despues di Pius X Basisschool tabata EPB, EPI, Universidad di Aruba, y ultimo Universidad di Phoenix, Arizona. E trayectoria por tabata considera un tiki largo pero bale la pena. Locual el a siña di su mes den e periodo aki, na prome lugar ta cu perseverancia ta clave den bida no matter ki obstaculo cu por presenta durante estudio e gana y determinacion pa termina bo estudio tin cu prevalece. “Durante mi estudio na EPB mi a keda mas di 2 luna afor pa motibo di salud pa kita un tumor na aña 1998 pero mi a logra regresa, studia duro y logra mi toetsnan p’asina mi logra mi diploma.” Pa ultimo el a siña cu e unico limite cu ta existi den bida ta esun cu nos pone pa nos mes – dus nunca bisa bon por tanten cu bo no a ni purba bo ta limita bo mesun crecemento. Pone mente na dje y sigui bay den trayectoria y crece bo conocemento. “E ultimo parti aki di mi mes a wordo stimula door con den boca di pueblo tabatin di EPB tabata abreviacion pa Enseñasa Pa Burico y cu lo mi kier a demostra cu no.” André a termina su estudio via Universidad di Phoenix door cu e tabata dune e flexibilidad pa labora y tambe studia p’asina sigui expande su conocemento. André a siña cu bo tin cu dedica tempo si kier logra progesa dus e ta keda na bo. Si bo slaag bo lo no logra pero si bo duna e mihor di bo parti bo por logra aunke bo ta laborando. Dus aunke bo ta laborando no para di studia. No stop di ta curiouso riba tema nobo of conoci pa nunca bo stop di studia y expande bo conocemento paso enseñasa ta algo bibo y no algo pa un periodo so. Pa e trabou cu e ta haci no solamente e mester ta un persona basta organisa sino tambe un persona cu atencion na cada detaye y critico.
TIPSNAN VALIOSO
Actualmente André ta duna su coaching services voluntariamente den su tempo liber na Qredits. “Durante mi dia diario mi ta labora na Newleaf Notary responsabel pe integridad di nos oficina pa nos compli cu tur regla nan AML/CFT cual ta mi enfoke dus no por competi cu otro companianan den servicio nan di consultancy cu mi ta duna durante tempo liber na mi Qredits Coachees”. Tipsnan importante cu e por duna ta por ehempel: 1.Conoce mercado (ken lo ta bo cliente – cuanto otro compania ta subiendo e mercado) bon cu bo kier bay drenta y haci bo analisis pa no drenta un lama cu bo ta kere ta bashi pero ya tin yen piscado ta pisca riba e mesun pisca. 2. Sea realistico den bo cifranan aunke ta ok pa pensa grandi pero no demasiado. Un bon coach sa di scucha bon na locual ta e necesidad di e persona pa enfoca riba esey y no na locual e mes ta mira cu kier cambia. Esaki lo haci e persona mas open na bo recomendacionan.
Y semper laga e persona sinti cu bo tey pa yuda y no dicta riba dje. Dus ta un klankbord pa ora e tin idea pa dune bo opinion. Tin un bon listening skills ta esencial pa coach riba e necesidad di e entrepreneur. “Ami semper ta cla pa comparti mi conocemento pa yuda otro, mi tin basta aña ta haci trabou voluntario por medio di Kiwanis y FAVI.”
André ta aplaudi tur entrepreneur pa nan corahe na prome lugar paso doing business ta un aventura cu ta mane roller coaster. Importante pa planea bon locual kier logra – of lo mas posibel prome cu bula den e awa. Entrepreneurs real ta esnan cu ta tuma risico y no tin miedo cual ta di admira pero semper bon pa tin persona pa support den bo area debil paso no tur ora un entrepreneur tin e conocemento financiero.
Por lesa mas di André su entrevista den nos edicion digital, tanto den Papiamento como na Ingles.
