KEN E TA?
Ora bo wak e ta cana den gym, bo no por evita di drecha bo postura y pusha 100%. Rene Wild ta kisas e trainer mas conoci y cu mas experiencia na Aruba y ta wordo respeta local y internacionalmente pa su conocemento di e materia, su experiencia y su capacidad di por a yuda centenares di persona recobra nan salud y nan forma. Cu su 57 aña di edad, Rene mes ta un ehempel di con biba saludabel y tene bo mes na un rutina di training por ta beneficioso pa bo salud fisico y sin duda tambe pa bo salud mental.
WALK THE TALK
Rene mes ta un ehempel bibo, cu su 57 aña di e beneficionan di hiba un bida saludabel. “Hopi hende ta puntra mi berdad con mi por ta traha 7 dia 4.30am pa 8pm y sin ningun duda mi ta kere cu mi lifestyle saludabel di drumi 7 pa 8 ora, come cumindanan saludabel so y vooral hopi berdura y train 4 pa 5x siman weight training y cardio – Fitness ta locual ta yuda mi den esaki”. E ta pensa cu na Aruba por lo general nos ta bayendo bon pa locual ta trata movecion y concientisacion, pero cu sigur falta hopi mas. Nos tin hopi hende cu malesanan manera Diabetes-Presion-Cholesterol-Fatty Liver y Sobre peso. Diabetes ta subiendo alarmantemente y nos echt mester haci algo na esaki. E mes a cuminsa caba, yudando tur esnan cu aserk’e, cu training y tips, semper cu su forma estricto y directo. Pero si bo sigui locual e ta bisa bo, resultadonan ta garantisa. Rene ta disfruta hopi di e proceso aki di mira otronan recobra nan salud. “E satisfaccion mas grandi cu mi ta haya ta ora cu mi wak hendenan cambia nan life style y baha 50lbs of kita for di remedi of regula nan sucu, baha presion y stop cu pilder… en corto, ora mi mira hendenan recobra nan salud!”
