Biba pa traha of traha pa biba? Esaki ta un dilema cu hopi di nos, specialmente ‘young profesionals’ ta cana cu ne den nos mente dia aden dia afo. En busca di e balansa perfecto entre su bida personal y su bida profesional, Nunette a tuma un decision cu hopi ta soña cu ne pero tiki ta durf di haci realmente: Bandona e seguridad di un bon trabou pa cuminsa riba su mes. Bibando den un epoca na unda “women empowerment” ta un topico di tur dia, e paso aki ta uno cu por wordo considera un paso fundamental di “self empowerment”. Su storia por yuda abo tambe cambia bo perspectiva…
“Mi obhetivo ta pa crea un bida cu mi ta disfruta di dje, haciendo loke mi ta gusta y agregando balor na esunnan cu ta scoge ami pa ta parti di nan proyectonan of di nan negoshi”. E no ta pensa cu bo mester ta independiente pa bo por yega na libertad profesional. Cuminsa na set boundaries cu ta yuda bo separa trabou for di bo tempo personal.
“Tin ora mi ta sinti cu hende ta pensa cu nos ta den un competencia pa wak ken ta esun di mas druk”. Su deseo sincero ta pa nos stop di glorifica e ideologia di ‘druk’ y cuminsa glorifica un bida cu mas proposito y un bida mas balansa, cu ta ofrece paz mental.
