Salud mental ta un topico actualmente hopi discuti. Na Aruba nos por constata casonan di suicidio y tambe depresion, y esaki kisas a wordo mas ainda eleva cu e pandemia di COVID 19 y tur su consecuencianan cu e tabatin pa nos comunidad.
Durante campaña electoral esaki tabata un punto cu a keda bin dilanti masha hopi mes y preguntanan tabata keda wordo lansa encuanto e facilidad cu posibel pacientenan cu problema di salud mental lo por tin pa yega
na tratamento. Internacionalmente nos por a mira tambe e tema aki a keda presenta principalmente durante Olympiada na Tokyo cu por ehempel retiro di diferente atletanan conoci manera Simone Biles y tambe ultimo
durante US Open cu Naomi Osaka.
Hecho ta cu awendia e topico di salud mental a bira mas abiertamente discuti. Xclusivo Magazine a presenta den un edicion pasa e thema aki papiando cu
un persona cu su mes ta un paciente luchando pa su salud mental. Den e edicion aki nos ta haci algun pregunta al caso na Misha Raymond (36) basa riba su conocemento di e materia. Misha ta un psicologo di profesion y actualmente ta parlamentario pa partido Raiz.
Pakico? Paso durante su campaña Misha a menciona hopi biaha e hecho cu nos mester haya un balanse entre “Welvaart en Welzijn”. Esaki a resona serca hopi hende y mirando e sucedidonan local y mundial, e ta mas al caso cu nunca. Como profesional riba e topico aki, e ta contesta e siguiente preguntanan encuanto Salud Mental.
Kico ta e problemanan mas recurente di salud mental na Aruba?
Loke nos ta wak entre e hobennan ta mas bien problema nan di angustia, depresion y e efectonan devastador di ‘childhood trauma’. E problemanan aki ta alarmante paso hobennan a la vez ta desaroyando nan personalidad. Lo cual nos kier evita, ta cu cierto problemanan manifesta den e personalidad. Paso esaki ta hacie mas dificil pa trata, trastorno di personalidad ta trece diferente retonan cu ne, mane un instabilidad emocional, decisionan iracional y problemanan cu hende nan rond di bo.
