Johanna (38) su pasion pa nutricion a cuminsa for di tempo cu e tabata bay scol. Semper el a haya importante pa tin un balans entre su salud y su bienestar general. Na Colombia el a studia 3 aña di Ingenieria Comercial, pero el a realisa cu esaki no tabata su pasion. Ora cu el a yega Aruba 21 aña pasa pa biba, el a studia hoteleria y turismo y idioma.
E momento crucial cu a pone Johanna bolbe den e ruta di salud y bienestar tabata un di e momentonan mas dificil di su bida na unda su yiu chikito a keda diagnostica cu problema congenito. Su famia a pasa den momentonan hopi dificil y esey a pone den su curason un deseo pa sigui studia y siña mas di nutricion. El a cuminsa prome cu distance learning na Institute for Integrative Nutrition y despues el a bay New York pa studia y logra diferente certificacion. Su pasion a keda crece, specialmente pa locual ta trata cushina y nutricion. Den nos cushina nos tin un botica completo cu medicamento natural. Dependiendo con nos ta cushina y cu kico y specialmente cuanto amor nos ta pone den dje, esaki por influencia nos salud na un forma positivo. Beneficionan por inclui perdida di peso, regula nivel di sucu, baha cholesterol, preveni cancer y otro enfermedadnan. Basa riba su conocemento amplio di e tema y su experiencia trahando como nutricionista pa algun aña caba na Aruba, Xclusivo magazine a aserca Johanna cu algun di e preguntanan mas frecuente encuanto nutricion.
Duna nos 5 tip cu ta facil pa haci cu por trece cambionan positivo pa un persona, cu no ta costa hopi placa pero cu ta efectivo? (menciona e cambionan positivo)
- Come mas bonchi, bonchi ta fuente di bra, mineral, proteina y vitamina importante pa bo salud.
- En bes di cumpra pan, pasta y crackers, cumpra carbs di berdad manera banana, yuca, batata dushi y traha tortillas, pany crackers cu nan. Esaki ta facil y bo ta asegura di haya mas fibra, mas probiotic fiber den bo dieet.
- Come mas pisca, pisca ta un fuente di proteina cu tin menos saturated fat, y tambe pisca ta conoci pa su gran aporte di essential fatty acids manera OMEGA 3’S,cu ta promote, cognitive, heart, hormonal, digetive, immune health.
- Purba un berdura nobo cada siman, asina bo por experimenta diferente berdura cu diferente nutriente, y cushina di manera diferente.
- Cushina mas na cas, si nos ta enfoca mas riba cushinamento na cas, nos ta mas consciente di kico nos ta cushinando, y esaki ta influencia nos salud y nos economia positivamente.
