“Mi a studia bestuurskunde como cu mi intencion for di mucha, biniendo di un famia politicamente activo tabata pa traha ariba maneho pa asina garantisa un mihor futuro pa nos tur”. Durante su estudio el a siña di tin un gratitud enorme pa tur locual cu su mayornan a siñe, pa nan guia, proteccion y preparacion. Durante e periodo aki el a realisa cu libertad ta bin cu responsabilidad y cu libertad tambe tin su limitenan cu mester respeta. “Ma siña cu si bo persevera bo lo logra y cu berdaderamente tur locual cu mi mayornan semper a recordami ta valido “Bo futuro ta den bo propio man” y si bo pone un meta, bo lo logre.
SPIRITUALIDAD Y RELIGION
“E forma cu ami a cuminsa explora spiritualidad ta for di curiosidad, lesando over di esaki, bay curso, wak imagenan di documentario”. El a wordo introduci na meditacion y asina el a hibe na descubri su camino spiritual. Paralel na esaki el a cuminsa un buskeda interior y tur loke tabata contribui pa haci su alma bon.
“Pami spiritualidad ta nifica conecta cu bo mes, cu bo interior”. Bo mester busca pa stima bo mes y stima otro. Spiritualidad ta dunabo tambe un paz interno inmenso cu bo mester pa navega den bo bida cu proposito. Den obstaculo, contratiempo y temponan dificil. E ta dunabo forza, corahe y empuhe pa bo supera esakinan. Den su trabou actual, Tai Foo ta busca pa wak e bon den e hende, sin huzga. Spiritualidad ta “center” bo, fuera cu e ta dunabo un proposito sumamente claro: nos tur tey ariba e mundo aki pa siña di otro, biba cu otro y
yuda otro.
Por lesa mas di Tai Foo su entrevista den nos edicion digital, tanto den Papiamento como na Ingles.
