Moda ta un lenguahe mundial. Sin bisa un palabra, locual bo ta scoge pa bisti ta transmiti un mensahe instantaneo. For di un edad hoben Ali tabata compronde esaki y su destino semper tabata pa yuda otronan compronde e lenguahe di moda. E aña aki e ta celebra 5 aña desde cu el a lansa su mes y su plataforma “Zhuzhed by Ali”. Durante e periodo aki el a siña hopi y tambe a asisti hopi hende, conoci y desconoci pa logra transmiti e mensahe cu nan tabata desea pa medio di locual nan ta bisti.
MODA Y SU MENSAHE
“Moda p’ami ta un vehiculo pa comunica bo ideanan”. Bo por ta un stay at home parent, un artista of un lider den bo trabou of comunidad. “Mi kier pa nos comunidad siña con pa uza moda pa manda mensahenan positivo, poniendo enfasis riba nos caracter y zjeito pa bida”. Pa e siguiente 5 añanan Ali su meta ta pa e tin un impacto mas grandi den e manera con profesionalnan ta presenta nan mes na trabou y e lo kier defini e standard den vestuario pa nos como un pais caribense. Hopi di nos normanan ta Europeo y mientras tanto nos clima y tambe Covid ta cambiando kico ta practico den nos cultura. Mi lo kier habri e combersacion pa nos por tin un dress code profesional cu ta representa e karakter di nos hendenan”.
Cualkier persona hoben eyfo cu tambe lo kier crea su mesun profesion of carera manera Ali, e ta conseha pa djis cuminsa. “Esey ta e parti mas dificil, cuminsa cu algo cu kisas niun otro hende no ta haciendo, mi lo conseha pa tuma esey como e challenge pa diseña e carera cu nan lo kier y keda lucha pa logra excelencia tur dia di nobo!”
