KEN E TA?
Jonathan (42) a lanta den cas di pueblo na Madiki. Tempo cu e tabatin 12 aña el a bay biba na Hulanda cu su mama y su rumannan, na unda su ruman mayor tabata biba y studia caba. Na Amersfoort el a biba y pasa gran parti di su hubentud, te cu su 16 aña. Akinan el a bay MAVO y durante su segundo aña nan a mande LTS. For di eynan nan a muda y biba pa un tempo cortico na Bonaire y el a sigui scol LTS richting electricien pa un tempo cortico te ora e mester a subi di nivel y pa e motibo ey el a muda pa Aruba back pa e por sigui e nivel ey.
UN INCIDENTE CU A CAMBIA SU PERSPECTIVA
E daño emocional cu el a sufri door di laga su peso bay for di man tabata cu e no tabata sinti su mes contento. “Ta bin e periodo cu hendenan ta bisa bo cu bo ta gordo y den bo mesun defensa bo ta bisa cu bo ta contento asina pero esaki no ta berdad”. Fisicamente bo ta cansa liher, bira floho y cancela tur cos y laga pa despues. E ta contento cu apesar di tur cos, nunca e no a haya gana di haci extreme diet of pensa na haci su mes daño. E “switch” a bin p’e durante un salida. “Tabata den un localidad nocturno unda dos hende a wordo severamente maltrata cu arma blanco y como ami ta polis mi mester a treed op mi so en espera di refuerso”. Despues di e incidente aki el a bay analisa locual a pasa e anochi ey y a puntra su mes honestamente con leu lo por a yega den su condicion fisico si cos lo a escala. E anochi aki el a termina cu su man rechts kibra na EHBO y e mester a wordo opera pa recobra uzo di su man. “Tabata durante e periodo di recuperacion cu mi a priminti mi mes cu mi lo bolbe back y mas fuerte”.
