Kico bo ta haci ora bo tin plan pa drenta politica pero eleccion ta keda hala algun luna prome y bo no tin tempo pa lanta bo mesun partido? Bo ta busca un partido existente y bo ta TRANSFORM’E! Asina Lisette Malmberg a haci cu su entrada den politica riba dia 15 di April 2021. Lisette no ta un nomber desconoci den nos comunidad y pa hopi aña caba tabatin papia di su posibel entrada den politica. Awor e ta un hecho.
PAKICO POLITICA Y CON BO A RICIBI E YAMADO PA DRENTA POLITICA?
E inquietud pa mi pais y pa mira e direccion cu e ta bayendo den dje ta existi pa hopi tempo caba. Pa hopi aña mi a purba di haci un diferencia atravez di multiple iniciativa social/civico. Sinembargo, e eleccion aki ta uno cu lo marca e rumbo pa e proximo decada. Mi a realisa cu bo no por cambia un sistema door di keda pafor di dje. Esaki ta e momento pa lidernan lanta y contribui cu nan voz y experencia pa e cambio cu ta necesario.
