Un heroe entre nos

Si bo puntra Jean Marc (24) pa conta di su momentonan di mas memorabel durante su niñez, e lo contabo di su dianan ta hunga cu su amigonan den e bario di Noord, coriendo pia bou, bay na cas di bisiña wak kico nan tin di haci of si e por a hunga den nan cura. “E tabata full un otro omgeving cu awor”. Futbol a drenta su bida cu su 4 aña desde tempo cu e tabata bay Scol Basico Washington. “Mi tabata prome un defensa diripiente e keeper a leshona y nan a bisami cu mi mester a bay para keeper. Desde cu mi tabatin 5 aña mi a para keeper y wakmi awor ta hunga pa seleccion di Aruba y semi-profesional na Hulanda”. Jean Marc tabata den e seleccion di Aruba U-20 cu a clasifica pa bay ‘U-20 world qualification’. Eynan el a resalta como un di e mihor keepernan y asina el a keda contacta desde Hulanda cu e noticia cu tabatin un team cu lo kier sa mas di dje. Asina el a bay Hulanda y su carera semi profesional den futbol a cuminsa.

“For di mi 15 aña mi a bay Miami unda mi a keda pa 6 luna, despues y Chile pa 1 aña, Inglaterra pa 3 luna y finalmente Hulanda. Sperando riba e temporada nobo, Jean Marc tabata na Hulanda ta entrena solamente. Eynan el a dicidi cu lo ta un bon momento pa tuma un break y bin Aruba pa por ta cu su famia cu e tabatin mas c’un aña sin mira. Apenas el a yega Aruba cu e pandemia di Covid-19 a bira un realidad y asina Jean Marc a bira un protagonista positivo den e crisis na Aruba, sin cu el a planea pa esaki.

Aunke Jean Marc no a yega di haci trabounan voluntario su mes prome, e ta corda si ta mira su mayornan ta haci esaki semper. “Mi tabata wak con nan tabata yuda hende semper di tur forma”. Unvez na Aruba, Jean Marc a cuminsa haci trabounan di entrega di cuminda pa e hendenan cu no tabata por a sali for di cas  y ta eynan cu su wowo a habri ora el a topa cu realidadnan duro na Aruba, y desconoci pa hopi; pobresa y necesidad. “Mi a ripara cu tin famia cu muchanan cu echt no tabatin nada. Mi tabata entrega cuminda na nan dus y mi a bisa mi mes cu mi mester por haci mas. Mi ta corda cu mi a mira con hopi hende tabata haci ‘challenges’ simpel cu otro riba Instagram. Eynan mi a cuminsa papia cu mi tata y su casa y mi a bisa cu eigenlijk hopi hende ta bay keda sin trabou y esunnan cu ya tabata tine malo, awor lo bay tine peor cu prome.  Mi a pensa pakico no bin c’un ‘challenge’ cu por yuda algun di e famianan aki. Asina mi a lanta Bossi Volunteers Group. Mi a haci un video pa mi por splica loke mi a pasa ora mi tabata haci entrega di cuminsa y pidi yudansa”. E prome salida di Bossi Volunteers Group, Jean Marc a logra yuda 160 famia, awendia ya nan a alcansa 200 famia total cu nan a yuda y ta sigui yuda mas tur dia. “Nos meta tabata eigenlijk pa yuda lo mas tanto hende posibel cu tur e donacionnan cu nos a haya di Aruba y danki Dios nos a logra. E ‘challenge’ tabata un exito pero nos kier djis sigui. Mi a haya un team masha great di hende, cu eigenlijk mi no tabata conoce. Mi tabata den contacto basta tempo caba cu Cede Aruba. Mi a pidinan un lista di nan voluntarionan y di esaki mi a scohe 6 hende cu tabata 100 porciento mi tras yudando, paquetando, haciendo tur e trabounan pa nos por a yuda e 160 famianan y mi ta hopi agradecido na nan. E ta danki na nan tambe cu tur e famianan aki a logra haya nan caha di cuminda”.

Riba nos preguntanan di casonan cu a impreshona Jean Marc, e tabatin varios. Tur ta casonan real; “E prome caso cu mas a impresionami tabata na Brazil, mi a bay e cas pa entrega cuminda y ora mi a yega, mi a wak e mucha su cara ora el a wakmi cu e cuminda. Tabata manera cu si mi a yega c’un PlayStation p’e. Despues di e ‘challenge’ loke a impresionami  tabata un yamada cu mi a haya di un meneer cu no tabatin trabou y cu tabatin 1 dia sin come. E  kier a pidimi si mi por a please yude. Mi a sinti e desespero den su stem. Mi a arma un caha di productonan di mi mes pa mi hibe p’e. E meneer a bisami cu nunca un hende a yega di haci esaki p’e den su bida. E cosnan aki ta loke a y ta impresionami. Mi t’ey pa yuda tur hende, no tin excepcion. Mi a duna e persona aki mi number personal tambe pa si algo pasa pa e lagami sa. Unavez na cas, comiendo cu mi famia na mesa, gradiciendo Dios cu ami si tin un plato di cuminda riba mi mesa, e meneer a mandami un potret di su yiu comiendo loke nos a caba di dune y gradiciendomi eternamente. Algun hogarnan no tin casi nada. Nan tin kizas un Frigidaire, un stove y un stoel y bo ta wak 3-4 mucha ta sali anto nan tin 2 cama solamente. Loke mas mi ta bisa hende pa por duna di donacion ta cuminda di bleki, lechi polvo, tur e productonan cu nan por uza den un tempo largo. Den varios caso bo ta wak cu nan no tin un stove of un frigidaire y eseynan ta e casonan di mas extremo. E ora ta purba na dunanan mayoria cuminda di bleki, cu nan por wanta nan stoma un poco y asina pa nos por wak kico nos por haci despues. E ta impresionami masha hopi mes cu nos a logra haci un diferencia den un minuut hopi liher y esey ta e diferencia di hopi di e fundacionan cu tin rond”.

“Mi dianan ta hopi largo. Mi ta lanta 8’or di mainta. Awor cu nos tin acceso na Club Kibrahacha, mi ta topa c’un algun di e voluntarionan eynan pa nos cuminsa coordina y planea e siguiente pasonan y kico lo ta nos retonan di dia pa por sigui yuda. Mi no por lubida cu mi tin un servicio di entrega/deliveries tambe pa e hendenan cu no por sali for di cas. Tur dia nos ta traha paketenan di cuminda. Nos ta sinta na mesa na Kibrahacha ta kibra cabes con nos ta bay haci e siguiente donacionnan. Ken nos por contact etc.  Tur dia por ta diferente, un dia mi por ta na cas di un hende y e otro mi por ta na Club Kibrahacha y otro dia mi por ta papiando cu hendenan di otro fundacionnan. E ta algo cu mi sa cu na final di dia, mi por a yuda un hende y esey e ta meta di Bossi Volunteer Group, cu na final di dia nos a logra yuda un hende”.

Bo por tuma contacto cu companianan of tagnan den nos postnan. E companianan cu ta resta cuminda y ta benta esaki afor, tin biaha ta cosnan cu no ta 100% daña y tin hende den necesidad cu por haci uzo di esakinan. Bisa e companianan aki di Bossi Volunteers Group pa nos por haya e donacionnan aki y yuda hendenan cu esaki. Esey ta e yudansa di mas grandi cu nos por tin awor, ya cu nos no tin suficiente donacion pa por yuda tur hende cu nos tin riba nos lista.

Aworaki den e situacion actual, mi no ta sigur kico mi lo haci. Na Aruba mi tin mi famia, na Hulanda mi tin mi bida, mi futbol pero cu e situacion aki tur cos ta cambia.  Mi mester bay wak bon kico mi lo bay haci y kico ta bay ta mi proposito na cada pais paso tambe mi mester puntra mi mes si mi bay Hulanda, na kico mi ta bay bek.  Hopi cos a cambia door di e crisis aki, dus mi mester pensa bon cu akinan na Aruba, si mi a ‘build up’ algo cu mi por sigui yuda hende y cu mi por sigui ta nifica algo pa un otro, esey ta loke lo ta mas importante p’ami”.