Desde su celebracion oficial na 1949, esaki ta e prome celebracion di Dia di Rey cu ta tuma luga, sin celebracion. Na luga di festival y celebracionnan grandi, Hulanda e aña ‘ki tin su atencion den con pa controla tur e efectonan cu e pandemia di Covid-19 a trece cune.
Rey Willem Alexander a tene su speech e biaha aki for di su oficina unda a dirigi esaki na tur e ciudadanonan di Hulanda y paisnan den reino pasando den e retonan debi na e corona virus. E celebracion oficial cu e famia real lo mester a atende e aña ‘ki lo tabata na Maastricht.
Rey Willem Alexander a bisa cu lo no tabatin nada mas cu e lo tabata kier pa mira e canalnan dorna y hende riba caya contento ta celebra awe, pero cu e distanciamento social ta importante durante e crisis aki. Den su discurso el a atende cu e diferente efectonan di e virus pa e diferente hendenan, di grandi pa chikito y a mustra su empatia pa cu tur hende. Prensa ta bisa cu mas y mas, e aprobacion y sosten pa cu e cas real a aumenta unda cu di un 68% aña pasa, esaki awor ta na un 74%. E compasion mustra di parti di famia real durante e crisis aki, lo ta un factor grandi den esaki.
“Esta special e ta pa toch logra forma un union den distancia di otro. 2020 lo ta un aña cu nos tur lo recorda apesar di e experiencia cu ta diferente pa nos cada un, pero mi ta spera cu e sentimento di union por prevalece y toka tur hende den e temponan dificil aki”, e Rey a bisa den su speech na e comunidad Hulandes. Willem Alexander ta celebra su 53 aña.
Mientras cu no tin fiesta awe na Hulanda, varios DJnan den e diferente ciudadnan lo toca canticanan di ‘Dia di Rey’ via live stream p’asina tur hende por baila, goza, aunke ta den privacidad di nan mesun cas.
