“Cu dolor na mi curason mi tin cu tuma e paso aki”, ta e forma cu Peter Balliere a informa Xclusivo Magazine di su decision pa sera portanan di Taste of Belgium Restaurant situa den Palm Beach Plaza Mall y aplica pa ley di bancarota pa haci esaki. E restaurant a habri su portanan pa prome vez na 2011, aunke Peter Balliere y Werner Vennen mes tin 23 aña caba haciendo negoshi den e sector di restaurant na Aruba. E decision aki tabata debi na un serie di factornan cu awor a intensifica mas ainda cu e efectonan di e crisis di Covid-19. Den un carta manda na su suppliernan, Peter ta splica e puntonan cu a influencia su decision cualnan ta varios y aki e ta referi na p.e., e cantidad di impuestonan nobo introduci cada vez pa gobierno durante e ultimo añanan como tambe introduccion di cobransa di parkeo na e mall unda e restaurant ta situa, menos negoshinan den e mesun mall pues cu menos bishitantenan pa esaki tambe. Covid-19 su efectonan di sera frontera locual a obliga e restaurant pa sera su portanan tambe dia 16 di Maart 2020 segun regla di gobierno, a caba di completa e dificultadnan ya caba presente.
“E momento cu nos a sera portanan, tur supplier a keda paga te cu un luna prome y ainda nos tabatin speransa cu nos lo por habri portanan liher bek pa sigui opera, pero esaki no tabata e caso mas. Na inicio a hasta trata na yega na areglo pa cu huur di e espacio sin exito”, Peter ta bisa. “Cu tur e gastonan halto pa haci negoshi na Aruba, e ta imposibel pa sobrevivi unicamente di localnan. E ta un decision duro pasobra ta 30 empleado ta depende di nos”.
Peter Balliere ta conoci pa su prome restaurant Le Dome cu el a habri 23 aña pasa. Durante añanan el a crea diferente cuponan di trabou den e area aki manera Chocolaterie na Renaissance Mall, The Bistro na Paseo Herencia, Cilo City Loung na Renaissance Marketplace, Papillon na The Village como tambe un compania di catering pa tur e tournan di catamaran of eventonan priva di The Palm Tours como tambe maneho di e restaurantnan pa Palm Island.
Aparte di haci negoshi na Aruba, Peter y Werner a duna bek tambe na trabounan caritativo manera Clown Doctors cual nan a funda na 2000 hunto cu otro fundacionnan manera Mi Por, Turtugaruba pa menciona algun. Tambe nan a organisa un cantidad di eventonan pa crea fondonan total cu ta surpasa di centenar di miles di florin pa fundacionnan manera Casa Cuna, Wilhelmina Kanker Fonds, Edmund Harms Foundation, Tsunami fund pa Unicef unda te awe tin un scol na Indonesia cu e nomber di Aruba riba dje y hasta a organisa un evento pa crea fondo pa aporta un gran parti cu placa na compra di e Bus di Salud pa Aruba pa haci chequeonan pa breast cancer serca hendenan den diferente barionan na Aruba. Na 2012, Peter Balliere a ricibi su condecoracion di Lid in de Orde Van Oranje-Nassau.
Tur cos ta poni den man di abogado kende awor tin cu percura pa cuminsa tuma pasonan segun nos leynan, pa e proceso di bancarota por cana su caminda y empleadonan y vendors por haya nan pagonan, manera prescribi pa ley. Taste of Belgium ta bira e prome restaurant cu ta cay durante e crisis aki di Covid-19.
