CroesBros

E dos rumannan Gilmher (26) y Jayden Croes (21), ta 2 rumannan Arubiano cu mas influencia riba social media si midi esaki segun nan siguidornan y ‘views’ cu nan ta hayando riba e diferente plataformanan cu nan ta figura riba dje. Mientras cu Gilmher tin riba 1 miyon followers riba Instagram, riba e plataforma di Tik Tok mes, e tin mas cu 23 miyon followers cu mas di 650 miyon views di su videonan. Su ruman chikito Jayden tin riba 20 miyon followers riba Tik Tok y cu su videonan mira pa miyones di hende rond mundo. E 2 rumannan aki ta creciendo den forma astronomico y tin awor sin duda, tur e potencial di ‘cash in’ riba e audiencia grandi cu nan ta gozando di dje.
E mas recien atencion cu nan a comparti riba social media ta e invitacion cu ambos a haya pa forma parti di un campaña di Dolce&Gabbana unda e cas di moda Italiano a busca e top influencers cu ta riba e plataforma di TikTok pa representa nan marca y disfruta di nan Fashion Show na Milan, Italia.

E oportunidad awor pa e 2 rumannan aki ta ‘endless’. Y tur cos a cuminsa na Aruba algun aña pasa, aunke e talento pa video ta di chikito serca ambos ruman. “Di chikito semper nos tabata traha video pa pret, mas grandi mi a bira mi a cuminsa traha motivation videos, esey a gara e audiencia su atencion. Nos a cuminsa traha videonan pret na Ingles, despues na Papiamento.

Asina ‘Haci Drechi’ a nace, y despues di Haci Drechi Musical.ly a bin den nos bida cual awor ta Tik Tok. Nos a cuminsa traha video, di eynan nos videonan a bai viral globally”, Gilmher ta conta.

“Nos a bira grandi, haya hopi followers door di nos unique comedies. Comedy tabata nos breakthrough”. No tin duda cu e dominio di varios idioma (Papiamento, Ingles, Hulandes y Spaño) a laganan gara atencion global rapidamente. Door di traha 2 pa 3 video tur dia, nan tambe a cuminsa bay ‘Live’ pa interactua cu nan fanaticonan y esey tabata unda nan 4 idiomanan a yudanan luci, hunto cu nan facilidad pa baila canticanan den diferente idioma y diferente ritmo.

“Aruba ta hopi importante pa nos, e ta nos cas, unda nos a nace. Si no ta pa Aru- ba, nos no ta ken nos ta awe. Aruba ta mi isla, un lugar hopi special unda nos a siña asina hopi cos, y e cuatro idiomanan cu nos por domina, ta haci nos hopi apart. Y unda cu nos bai, nos ta bisa cu nos ta di Aruba (the Proud Aruban Boys)”

Gilmher y Jayden ta riba Wall of Fame di Musical.ly, cu awor ta Tik Tok, na su oficina principal na Los Angeles; nan a logra esaki door di e titulo di Top Creator Active User y tambe door di logra di ta varios biaha den e Leaderboard di Tik Tok. E leaderboard kiermen e pagina cu mas trafico riba e App. Tambe na 2017 nan a keda invita como ‘Featured Creator Guest Speaker’ na VidCon, cu ta e conferencia di mas grandi di video digital online na mundo; y pa e anochi di Teen Choice Awards 2017, nan a presenta ‘En Bibo’ y fuera di esaki nan traha un video cu a ser pasa na e pantaya grandi riba e anochi ey.

Nos a nace ta pensa cu door cu nos ta bin di un Isla hopi chikito, nos ta limita. Nos kier kibra e ijs ey. Nos kier mustra cu bo por logra kico cu bo ta desea den bida , si bo kere den bo mes y traha duro pa e meta cu bo tin”.

“Nos a keda trata manera rey ora nos a yega Milan”, Gilmher ta conta di nan viahe riba invitacion di Dolce & Gabbana. E rumannan duo a actua den e video di e marca aki y ta sinti cu e cas a keda hopi contento cu nan y no ta descarta cu nan lo keda yama bek pa haci mas trabounan. Aparte di esaki, Gilmher y Jayden ta traha cu otro companianan internacional actualmente manera Fashion Nova, Universal, Chipotle y mas. “Sigur den 2020, nos tin varios proyecto y visionnan nobo cu nos lo kier haci. Sigur nos lo kier traha cu Aruba”. Cu nan audiencia den miyones, e oportunidad pa un plataforma asina pa promove Aruba lo ta uno di oro. “Te ainda nos no a keda yama pa oficina di turismo di Aruba, pero nos ta habri pa traha y yuda promove nos isla sigur. Nos ta di Aruba y tur caminda cu nos bay, nos ta percura pa tur hende sa esey. Tambe nos videonan ta haci na Aruba y nos fanaticonan ta wak esey tambe. Mi ta kere cu Aruba kizas no ta realisa e impacto cu e plataforma cu nos ta traha cune tin. Prome kizas tabata wak nos como un joke pero mi ta kere cu loke nos ta logrando ta di respeta. E ta un oportunidad di promocion sigur”. E duo tin nan manager cu ta encarga na book y maneha cu nan clientenan p’asina nan mes por keda concentra riba e parti creativo di nan videonan cu ta dirigi awor na un audiencia mas di nan edad. “Prome nos tabata haci hopi sketches di comedia, awor esaki ta mas den contamento di storia y accion. Nos ta keda traha tempo completo riba e plataformanan aki. E ta un soño paso awor nos mes por mantene nos mes, y haciendo algo cu nos ta stima. Y kico mas great pa por haci esaki cu bo mesun ruman”.

Informacion Manager Croes Bros: [email protected]