E “Restart Conversations” virtual summit ta un iniciativa di e co-creadornan di Career IQ: Kareline van der Linden y Darice Solognier. Career IQ Aruba ta un plataforma di desaroyo profesional cu ta consisti actualmente di un show na radio y podcast, unda cu tur siman ta brinda varios conseho practico y eficiente enfocando riba e lidernan local den nos comunidad tocante con cada un di nos por desaroya nos propio carera, alcansa nos metanan profesional y logra disfruta e bida cu nos tur ta desea. A lansa e show na januari 2019 y awe e ta den su di 4 temporada cu mas di 40 entrevista cu diferente lidernan local.
INICIO
E idea a nace como cu nos a observa cu tabatin hopi preocupacion den nos comunidad encuanto e impacto cu Covid-19 tin riba nos economia y na mes momento e influencia cu esaki lo tin riba e bida diario di henter nos comunidad. Nos a pensa cu esaki ta bon momento pa tin un plataforma unda diferente expertonan por dialoga riba topico y temanan relevante cu ta wordo afecta door di e pandemia aki p’asina hunto dialoga pa supera e reto aki y asina “Restart” Aruba, nos isla.
E summit lo tuma lugar di forma virtual y esnan cu ta desea di participa por inscribi na Career IQ su pagina di evento riba Facebook. Despues di registra nan lo por sigui e summit via di nan computer, telefon celular, of tablet den e webinar format. Ademas di por participa den e forma digital, Career IQ a sera un partnership cu nos canal nacional Tele-Aruba p’asina haci e evento importante aki accesibel na nos comunidad en general, specialmente nos grandinan cu kizas no tin acceso pa participa den e forma digital, pues esaki lo brinda e oportunidad pa nan tambe participa na e combersacion.
Darice Solognier
TEAM:
Career IQ a crea un team di hoben nan profesional pa yuda cu e organisacion di e summit. E team aki ta consisti di Sue-Ann Lee (docente na Universidad di Aruba), Marisol Sanchez (Marketing Manager na Amsterdam Manor) Darysse Croes (Account Executive Palm Tours) y Ryon Dijkhoff (Senior Associate Advisory & Assurance na Grant Thornton). Hunto cu e team aki y basa riba e topiconan cu nos kier a presenta a scoge e personanan cu wordo invita pa participa den e summit. E meta principal di e summit aki ta pa tin un dialogo riba con nos lo “Restart” Aruba, pues a selecta e personanan di ambos sector publico y priva pa asina hunto nos tur por traha na un miho Aruba.
IMPORTANCIA
Durante temponan dificil ta facil pa nos somete nos mes na e sentimento di miedo cu ta wordo causa pa incertidumbre, pero awo mas cu nunca nos isla tin mester pa nos comunidad di forma colectivo uni na crea un miho Aruba despues di e crisis.
Kareline Van Der Linden
META
E meta principal di e summit aki ta pa tene un combersacion colectivo di ambos sector publico y priva con nos lo por “Restart Aruba”. Hopi biaha riba nivel di maneho tin falta di e “input” di esnan “in the field”, pues por medio di un dialogo colectivo nos ta spera cu por nace ideanan y acionnan concreto cu ta un “win-win” pa ful Aruba. Sinembargo ta keda na nos tur pa traha hunto pa yuda Aruba supera e reto aki – “We are in this together”
TEMANAN
Basa riba di aspectonan clave a agrupa temanan pa “Restart Aruba”, pues cuminsando cu economia y entrepreneurship, sigui pa turismo cu ta e industria principal pa Aruba cu na mes momento den e periodo aki di Covid-19 nos ta observa tambe con vulnerabel e industria aki ta.
Plan y strategianan prome cu Covid-19 sigur no ta relevante mas cu ta rekeri pa nos bay bek “to the basics” y colectivamente bin cu solucionnan duradero y sostenibel pa e industria clave aki. Por ultimo ta dificil pa “Restart” Aruba sin innovacion y sin contribucion di nos comunidad, pues pesey e summit lo culmina den un dialogo encuanto e temanan aki.
E informacion colecta lo keda comparti cu tur e partidonan envolvi, tambe lo comparti e resultadonan di e “15 ideas challenge” y cualkier otro resultado cu sali for di e summit cu entidadnan publico y priva p’asina por yuda trece accion tras di e ideanan aki. Tambe door di e participacion di personanan clave den nos comunidad den e audiencia y parti di ekiponan den diferente sector cu por scucha y participa na e discusionnan aki y forma un “ripple effect” di ideanan discuti durante e summit aki di inmediatamente den nan organisacion pa asina nan por contribui pa ta e cambio cu nan kier mira pasa, realisa.
FUTURO
Den 2020 – Career IQ lo sigui traha pa ta un plataforma di desaroyo profesional unda nos lo sigui cu e di 5 temporada di e podcast/radio show y tambe pone mas enfoke riba e tema di “future of work” por medio di estudionan y “partnerships” cu diferente entidadnan p’asina por colabora y crea synergia. Por medio di introducion di diferente workshops y tutorials riba e tema di desaroyo y crecemento profesional na Aruba. Por ultimo, Career IQ lo sigui explora e plataforma di “webinar” virtual cu e meta pa inspira dialogo pa hunto nos por traha na un miho Aruba.
Nomber: Darice Solognier & Kareline Van Der Linden Edad: 33 & 33 Profesion: Darice Solognier ( Marketing Manager Hyatt Regency Aruba Resort ) & Kareline Van Der Linden (Business & Strategist Researcher -Research lecturer at University of Aruba) Motto in business and life: Career IQ: Make it happen Darice Solognier: The key to success is to start before you are ready - Marie Forleo Kareline van der Linden: How wonderful it is that nobody need wait a single moment before starting to improve the world - Anne Frank
