Un paso grandi den su bida ta e forma con Raynedrick Koolman (30) ta mira bek na e decision di sigui su estudio mas avansa na Hulanda. “Terminando mi estudio na Colegio E.P.I. durante e di cuater aña, mi a inicia c’un sondeo pa sa mas o menos kico ta e opcionnan cu mi tin na Aruba mes y pafor di Aruba. Conhuntamente cu mi mentor nos a bin encontra e programa di International Tourism & Travel Industry na NHTV University of Applied Sciences. Como cu e programa ta uno amplio basa riba e industria di Turismo y Aviacion, pero tambe uno cu ta ofrece e oportunidad pa haci e bachelor degree den 3 aña, mi a opta pa scoge esaki y pone esaki como un reto y meta grandi mi dilanti pa logra.
APORTANDO BEK
Actualmente mi ta eherciedo e funcion como Sales & Marketing Manager na
Pelican Adventures. Pelican Adventures ta un compania cu ta inclui tambe Pelican Nest Seafood Grill (Restaurant) y Monforte Luxury Cruise. Como manager mi tin e tarea di maneha, controla y percura pa mi team di benta ta eherciendo nan trabou na nivel a base di e standard di compania, pero tambe percurando cu ta logra y surpasa e metanan di benta tur luna. Tambe mi ta encarga pa maneha e parti mercadeo tradicional pero tambe digital.
Pa mi eherce mi funcion, mi tin e sosten y ayuda di mi director y supervisor p’asina hunto nos involucra nos team di benta pa conhuntamente fiha e metanan, logra esakinan, percura pa traha hunto c’un bon comunicacion y desaroya nos mes na tur momento profesionalmente.
