Bida ta desaroya di manera diferente pa cada ser humano, esaki ta algo mas cu logico ya cu nos ta considera cu ‘cada cabes ta un mundo’. Pero aunke bida por ta hopi diferente pa nos tur, nos tur tin e mesun sentimentonan y e tipo di experiencianan aki cu tin biaha por yuda un otro na haya e balance den nan bida. Esaki ta e caso di Rachel Brathen, mihor conoci den e plataformanan social como Yogagirl.
Actualmente Rachel tin 28 aña, di e cual e tin 7 bibando na Aruba. Originalmente di Suecia, Rachel a desaroya interes den mundo di yoga for di tempo cu e tabata un teenager. E tempo ey e tabata pasando den un temporada dificil di conflictonan cu su peso y poco rebeldia manera hopi teenager, loke a pone su mama dicidi pa mande un ‘camp’ di meditacion. Esaki ta mas cu un decada pasa y tabata e cuminsamento di un mundo nobo p’e. Cu su 18 aña, Rachel mes a dicidi pa bay Costa Rica en busca di algo nobo unda el a sigui cu meditacion y no mucho tempo despues, a hib’e na descubri e mundo di yoga. “Semper mi tabatin un dolor fuerte na mi lomba y un hende a recomendami pa purba yoga pa calma e dolor y e realidad ta cu el a yudami hopi mes”. No a dura mucho cu Rachel a descurbi cu e poder di yoga ta bay hopi mas leu cu djis kita e dolor di lomba ey cu e tabatin.
Destino - Aruba
Despues di 3 aña bibando na Costa Rica, Rachel su ruman muher y su tata a bin Aruba pa un vakantie durante e temporada di pasco unda cu despues di dos dia na Aruba, Rachel a drenta un surf shop unda cu el a conoce Dennis, kende actualmente ta su casa y tata di su baby Leah.
Nan a conoce otro y a pasa hopi tempo hunto durante e siguiente 5 dianan di su vakantie. E sentimiento tabata hopi bon, asina bon cu Rachel a bolbe Costa Rica pa 2 siman so pa despues tuma e decision pa bolbe y bin biba na Aruba definitivamente. “Ora mi a bin Aruba, yoga no tabata un practica asina popular, tabatin poco studionan rond di e isla y uno conoci cu tabata ubica den e parti patras di un cas. Pero ora di busca riba Google, e tabata hopi dificil pa haya algo relaciona cu yoga. Mi a logra haya trabou como Yoga Director na Manchebo Hotel. Eynan mi tabata duna entre 20 pa 25 les pa dia”, Rachel ta conta. Algo completmente diferente na con el a evoluciona awendia den e mundo di yoga. Tur cos a cuminsa c’un post…
Yoga girl goes viral
E tabata riba social media y ainda ta corda su prome post cu tabata riba su cacho Ringo na aña 2012, cu no a haya ningun reaccion. Su boom riba social media mes a cuminsa algun aña despues, na 2015, prome cu e posenan di Yoga y consehonan di inspiracion y tabata riba algo hopi mas profundo. El a dicidi pa post y comparti un experiencia hopi personal di su famia, su lucha pa sobrepasa su mesun sentimiento riba intento di suicidio di su mama, e sentimiento di abandono cu esaki a causa den dje mescos cu e responsabilidad riba dje. Den apenas algun ora el a haya mas di 30 mil likes y comentario. Con por ta? “ E ta e naturalesa di e ser humano, nos kier por sinti nos mes conecta cu otro hende. Sinti cu nos no ta nos so, cu nos por sinti cu tin mas hende cu e mesun problema of por ta den e situacionnan cu nos ta aden. Principalmente, cu e ta okay pa ta imperfecto y pa nos sinti insigur. Tin hopi hende cu ta sinti hopi miedo pa comparti nan berdad cu mundo, di ta real dilanti di otronan”, Rachel ta splica. Pues ora un realidad ta sali for di otro hende unda nan por mira nan mes, e reaccion ta genuino y den su caso, e tabata exorbitante den cantidad. Reaccion a continua y Rachel a tuma esaki cu man habri. Hunto cu e reaccion, a bin oportunidadnan nobo y unico pa Rachel. “ Mi a mira e social media como un tremendo herment pa haci hopi mas. E exito no a spantami, e tabata mas tanto ‘exciting’ y ‘fun’. Mi tabata biba na Aruba y mi tabata sintimi hopi limita riba e capacidad di les di yoga cu mi por a duna pa dia di cual, segun e exigencianan, tabata limita na 15 hende solamente. Awor cu e cantidad di siguidornan,‘followers’, riba social media, mi por viaha rond mundo, comparti mi conocemento y sigui crece como yoga instructor. Mi por a simplemente trece mas hende hunto, cual p’ami ta e parti mas importante”, e ta splica. “Entre mas auntentico bo ta, mas profundo e coneccion lo bira c’un otro hende”. Por cierto, bayendo bek na su prome post di su cacho, awendia e instagram di su cacho yama Ringo the Gringo, tin cu mas cu 99 mil followers.
Wowo di mundo riba yoga girl
Na 2017, Rachel a keda nombra pa Forbes como un di e ‘infuencernan’ di fitness mas importante den social media y aunke e no ta sinti hopi presion door di esaki, e ta sinti cu e ta un honor grandi ya cu e ta e unico persona den e lista cu ta representa yoga. “Esaki ta inspirami pa continua crece den e mundo di yoga pero kedando semper berdadero na e intencion di sigui inspira hende pa nan sinti mihor, no solamente den e parti di fitness, pero tambe den e parte interno, cu ta esun di mas importante”. Pero cu e positivo, ta bin tin biaha e negativo tambe y Rachel no tabata excepcion na esaki. Tabata riba un post tocante un vacuna cu el a duna su baby Leah ora e tabatin 4 luna. ‘Mi no tabata sa con grandi e debate aki tabata rond di mundo y mi a haya mensahenan cu odio riba e topico aki. Esaki a ponemi dicidi cu mi no lo post nada mas di mi yiu of riba e topico di vacuna”. Mirando su fama ya mundial, e ta logico pa pensa cu e mundo comercial tambe ta pone wowo riba Rachel y mire como un vehiculo efectivo y directo di promocion. E ta splica cu esaki ta algo cu casi nunca e ta haci riba su rednan social pasobra cu e ta sinti cu e lo no ta algogenuino. E kier enfoca riba e comunidad y no bira un ‘marketing space’.
“Mi ta haya hopi propuesta casi tur dia y aunke nan ta lucrativo, mi ta prefera di bisa no. Tin biaha mi ta haci colaboracion pero e tin di haber mas tanto cu eventonan di caridad of un bon causa. Y aunke tin di nan tin propuestanan increibel, mi no ta promove algo cu no ta resona cu mi balornan. E mester ta algo bon pa mundo henter”, e ta bisa.
Con bo a yega na e nomber di YogaGirl?
“E tempo ey mi tabata practica hopi yoga y e nomber aki a echt bin di su mes, na cuminsamento mi mes no tabata guste mucho paso mi tabata sinti cu e ta hopi comercial, pero awo mi ta realisa cu e ta un di e aspectonan di mas importante y mas fuerte cu mi tin. Esaki ta loke a yuda duna chispa na e ‘movement’ te cu awor. Nos tin un marca cu ta facilmente reconoci y cu tur hopi hende ta sinti identifica cune”.
Yoga; e solucion pa hopi
Den e caso di Rachel, e ta considera cu yoga tabata un herment hopi util pa yuda su mes, specialmente pa kita e dolor di lomba cronico cu e tabata sufri di dje y ta convenci cu lo ta algo cu lo por yuda e muchanan y e hobennan pa nan por supera e diferente situacionnan cu nan ta pasa aden durante scol.
Yoga tin e capacidad di siña nos con pa sali for di nos cabes y drenta nos curpa, ya cu e mayoria di e problemanan cu nos tin ta wordo engrandece door di nos mesun mente. Dus, e ta siña nos con pa hala rosea, con pa ta presente den e momento, con pa medita y asina nos por haya balance y paz. Esaki lo ta algo cu e lo kier yuda promove den scolnan basico y secundario.
Ken por haci yoga?
Segun Rachel, na Aruba tin un confusion ora di papia di yoga, pues mayoria di hende ta kere cu ta algo religioso pero no, e no tin nada di haber cu religion. E persona por ta Christian, Catholico, Muslims of Atheist, kere den kico cu nan kier y toch nan por practica yoga. “Yoga ta un estilo di bida di mas di 5 mil aña di existencia y loke nos conoce como yoga na e parti di mundo aki, ta Yoga fisico. E tin di haber cu posenan cu ta conecta cu respiracion y ta un training beneficioso pa diferente proposito, entre nan pa baha peso, pa fortalece y tonifica e curpa, pa haya flexibilidad. Tambe e por ta algo cu ta restaura, yuda cura e dolornan y yuda baha stress. Nos tin diferente tipo di yoga y power classes cu ta hopi dinamico y ta beneficia nos curpa, nos mente y nos spirito’. E arte di hala rosea ta hopi importante den yoga, bo por practica esaki for di mucha te cu ora bo tin 100 aña di edad mes. Esaki ta haci’e un practica basta sostenibel y cu no lo hiba e persona na un lesion, pero cu lo yuda pa cura for di cualkier lesion cu por tin. Yoga ta ideal pa cualkier tipo di atleta cu ta train hopi duro y cu por sufri dolor di su ‘joints’’ of di su musculonan.
SUP – Yoga
Rachel ta un di e pioneronan na mundo cu a inova pa haci yoga for di un StandUp Paddle board, y a desaroya un practica nobo cu yama SUP-Yoga. Esaki ta algo cu ta tumando hopi forsa den diferente festival rond di mundo locual e ta inclui tambe den su retironan, master classes y workshops. E estilo nobo a nace di un dia cu Rachel tabata wak su guy ta surf cu nan cacho y el a pensa cu kizas e lo por haci yoga riba e tabla di surf, pero e realidad ta cu no tabata posibel. Pero asina cu e Paddle boards a yega Aruba, el a purbe. El a dicidi pa haci varios pose tras di otro riba e board y un rato despues el a ripara cu el a caba di crea full un rutina di yoga riba e board. “E momento cu mi a keda cla mi a ripara cu tabatin un crowd riba beach cu kier a haya mas informacion y nan a puntrami si mi ta duna les di dje. Nos a cuminsa cu SUP Yoga cu 2 studiante y actualmente nos tin 30 cupo y constantemente nos ta ‘sold out’. E ta un practica pa hendenan cu ta gusta aventura paso e ta conecta cu naturalesa – e lama abou, e shelo ariba. E ta bon pa balance y pa fortalece.
Postnan di Instagram
Un post di Instragram por haya 2, 3 of 4 mil comentario pa dia, e ta depende over di kico e ta bay. Y aunke Rachel ta pendiente di post tur dia, e tin suficiente asistente pa yude contesta emails. “Mi kier pa tur hende haya un contesta y aunke mi no por contesta personalmente cada mensahe, e intencion ta pa cada persona haya un reaccion. Mi ta haya hopi storianan bunita di hende cu kier comparti cumi con nan a yega na yoga, sea cu nan a haya inspiracion via e yogagirl account of pa via di e potretnan cu mi ta share. Pero tambe mi sa haya esnan un tiki mas dificil unda cu hende ta busca ayudo cercami, y te hasta carta di suicidio of di hende cu no kier biba mas. Esakinan ta hopi ‘challenging’ y mi ta purba di contactnan personalmente. Nan ta scirbi esaki posiblemente door cu ami ta post tocante di mi sentimentonan, cosnan personal y mayoria di hende ta busca e coneccion profundo ey’. Aparte di hende cu ta busk’e cu bon intencion, Rachel ta conta di un ‘stalker’ tambe kende a bula te Aruba y busca su cas pa un siman te cu finalmente el a logra haya esaki y drenta sin bati na porta mes. E situacion tabata uno incomodo y esaki a haci cu nan a busca un sistema di alarm pa mas proteccion.
E impacto riba e rednan social di Yogagirl ta basta grandi, no ta unicamente e cuenta di mas grandi di yoga na mundo, pero su centro di bienestar ta esun di mas grandi den Caribe. Asina mes e no a logra te ainda un contacto cu e hendenan di oficina di turismo, ATA pa wak si nan por colabora cu otro den e area di turismo, teniendo na cuenta cu hopi turista ta bin pa e tipo di turismo di salud cu Island Yoga ta ofrece. Mundo di yoga ta un industria hopi grandi y nos tin e suerte cu e ta mainstream na Merca y cu casi tur hende ta practica yoga, cu ta bale la pena pa desaroya e turismo di salud, di relahamento y di yoga retreats. “Mi ta kere cu e idea di travel y di bolbe descansa ta loke hopi hende ta busca awendia. Hopi hende no ta biaha mas djis pa ta burachi henter dia, pa come chicken wings y pa keda riba beach henter dia sin haci nada. Esey ta un mentalidad biew y mi ta spera cu hotelnan por tuma nota cu nos por cuminsa ofrece opcionnan mas saludabel. Kizas nos por traha hunto y desaroya algo bunita”, Rachel ta bisa.
Leah Luna
E bida di Rachel y su casa Dennis a cambia 4 luna pasa cu e yegada di Leah Luha, nan baby-girl. ‘Semper mi tabata post entre 5 y 6 biaha pa dia, pero awo mi ta post 1 biaha so. Mi ta ocupa cu e baby, nost tin cu maneha 7 compania, mi ta bezig ta scirbi un buki y mi no tin tempo pa nada mas. Mi sa cu tin hopi hende cu tin un strategia pero ami no tine, paso esaki ta algo personal y mi no kier wak e como e ‘marketing business’ convencional. P’ami, e mester ta algo di valor cu mi kier comparti, mi kier mantene esaki bunita y cu sentido. P’ami e tin mas di haber cu loke mi ta skirbi cu e potret/ imagen mes.
Pakico Aruba?
Mi casa ta di Aruba, nos tin 7 aña bibando na e dushi isla aki. E unico parti cu mi lo cambia (si mi lo por a cambi’e) ta e ‘online banking’. E servicio aki ta asina limita cu e ta stroba ora cu empresarionan kier expande. Den nos caso nos tin un ‘global business’ y ora nos clientenan kier paga online na Aruba nos no ta traha ni cu payPal. E ta hopi dificl pa trece placa di afo na nos isla pa medio di negoshi online. Esaki ta stroba un tiki nos idealnan paso no kier bin cu cosnan grandi pero pavia di dificultad cu e ‘banking’ mi no lo por habri mi oficina di headquarters na Aruba, cu lo ta un oficina di 35 pa 40 empleado y cu lo mester ser habri sea na Sweden of na Merca. E ta un challenge cu ta stroba e entrepreneurnan di desaroya.
Island Yoga
E concepto aki a ser diseña for di cuminsamento pa pueblo di Aruba, no pa e turistanan. E intencion ta pa nan haci uso di e centro di Wellbeing aki y pa nan no sinti intimida si nan no sa nada di yoga paso nos tin cursonan unicamente pa beginners y eseynan ta esnan di mas popular actualmente. E Nourish Café and restaurant ta sirbi cuminda vegetariano, saludabel, y smoothies. E ta algo cu ta nace di e necesidad di un lugar cu ta ofrece cuminda asina, dus mi ta kere mi tabata un tiki ‘selfish’ y mi tabata kier un lugar unda cu mi por a come na mi smaak. Esaki ta e mihor cafe di Aruba, pero claro, ami ta e doño”. Actualmente Rachel ta haci entre 8 y 9 retiro di yoga pa aña y su cuenta di Instagram, ‘ Yogagirl’, tin mas di 2 miyon di siguidornan un di e cuentanan di yoga mas grandi di mundo. E ta sinti cu e retironan di yoga a yude pa pone Aruba riba e ‘mapa’ di destinacion den e mundo di retironan di yoga, ya cu esaki a cuminsa trece un turismo diferente riba nos isla. Entrenan, a bin instructornan, e participantenan, gruponan di companianan priva pa menciona algun. Awo nos tin ‘Island Yoga’ cu ta e centro di wellness y meditacion mas grandi di Caribe y hopi di e turistanan ta bisa cu nan ta bin Aruba ta unicamente pa participa den e retironan.
Integra na nos cultura
“Mi ta kere cu e prome añanan mi no por a siña Papiamento door cu casi tur hende tabata papia Ingles cumi. Mi ta papia Spaño bon y mi tabata confundi esaki cu Papiamento na cuminsamento, pero ora mi a dicidi di compromete mi mes na esaki, mi a siña den un par di luna. Papiamento ta un idioma bunita y mi ta haya cu si mi ta biba na Aruba, mi mester papia e idioma. E ta un forma di mustra respet na e cultura local y toch ta great pa papia otro idoma nobo.
Mi ta spera nos baby siña Papiamento tambe, actualmente nos ta papia cune na Ingles, Swedish y Papiamento”. Actualmente Rachel ta cabando su di dos buki, e lo sali pronto riba mercado, y nan tin un plataforma online cu yama 108, cu ta manera un Neflix pero di yoga. Den nan plannan tin pa habri un Island Yoga na Sweden y otro na Merca. Tambe mi lo ta lanzando un linea di joyas y bela prome cu aña caba. Mi ta den proceso tambe di explora con pa haci un linea di paña mas ‘cost effective’, ya cu mi kier concentra den organic y sustainable y actualmente esey ta hopi caro ainda. Nos tin hopi plan, pero baby Leah ta tuma 100% di mi tempo, e ta mi prioridad.
Mi ta hopi agradecido di por biba na Aruba, esaki ta mi cas y mi lugar favorito di mundo henter! E tin e balance perfecto di beach y naturalesa, bon infrastructura y criminalidad toch ta abou, e hendenan ta open minded. Mi ta spera cu gobierno stop di construi hotel riba tur beach y cu nan por compromete mas na e metanan di sostenibilidad. Inverti den solar y wind energy, bin c’un programa pa recycla na cas, paso e turismo ta bayendo bon caba, awo nos tin cu proteha e naturalesa. Mi lo kier wak pa yoga bira un ‘movement’ na Aruba y pa e integra den cultura di un manera cu tur hende por beneficia di dje. Nos mester self-love y tin amabilidad den e practica di yoga cu mi ta kere nos tur mester di bai den e direccion ey.
