Piloto Raoul Wijngaarde

E aña ‘ki lo a marca 19 aña desde cu Raoul Wijngaarde (45) a caba su estudio den loke ta su pasion tambe, aviacion. “Mi a traha pa aerolineanan manera Tiara Air, InselAir Aruba, EasyJet y awor Aruba Airlines den e 15 añanan cu mi ta trahando como piloto comercial. Mi a cuminsa bula cu e Shorts 360 di Tiara Air, despues mi a subi e MD80 serie di InselAir Aruba sigui pa e Fokker 70. Na EasyJet mi a bula Airbus 320 y esey ta locual mi ta bulando actualmente na Aruba Airlines”. Como piloto, e profesion a hibe varios caminda y experencia varios situashonnan di trabou unico, pero loke e ta experenciando awe cu e pandemia debi na Covid-19, nunca el por a imagina.

Raoul ta corda cu desde December 2019 caba el a cuminsa tende di un virus cu a cuminsa na China, cual no a kita mucho atencion di dje. Tabata te cu Februari 2020 cu a informacionnan a cuminsa sali con contagioso e virus ta cu el a cuminsa haya su atencion completo. Informacionnan con e virus aki tabata plamando rond di Europa y e medidanan cu gobiernonan a cuminsa aplica pa contene esaki tabata ya imposibel pa ignora. Y na Maart di 2020, el a haya e prueba con serca e efecto di e virus aki tabata p’e. “E luna aki nos a haya e informacion cu nos no por a sigui bula mas. Nos a keda informa cu mirando e hecho cu tur e fronteranan di e paisnan cu nos ta bulando ta serando, mester para e operashon completamente te cu proximo aviso”, Raoul ta conta. E tabata un noticia dificil pero e ta admiti cu el a wak esaki ta bin. “Mirando e trend cu ya tabata tumando lugar tur caminda rond mundo den e industria di aviacion, mi a prepara mi mes mentalmente pa locual tabata na caminda pa nos tambe. Dus e noticia no cay como un sorpresa pero claramente e tabata sumamente fastioso”.

Un piloto, normal den aire di un pais pa otro, Raoul awor tabata na cas, mas tempo cu normal, locual awor a bira su ‘new normal’. Ahustenan mester a keda haci manera adapta e manera di biba y cuminsa controla e gastonan mihor paso, ya no tabatin entrada. “Mi mester bisa si cu e shelter in place y e hecho cu tur lugar ta sera ya ta preveni cu bo no por gasta placa na cosnan cu no ta necesario”. Hunto cu su casa Richeilla, como famia e ta bisa cu nan mester a busca manera pa entretene nan yuinan na cas. “Nos ta haci hopi movie nights, spelletjes avond etc pa yudanan. Nos ta den preparashon tambe pa muda dus mi ta druk bezig trahando riba nos cas p’asina mi tene mi mes bezig anto mi no mester sinta na cas ta pensa y preocupa henter dia riba e situashon actual”.

Tur hende ta papia y purba imagina kico e bida di tur hende, segun nan situashon, lo ta den e ‘normal nobo’ mientras cu no tin un vacuna pa e virus di Covid-19 cu a bira un Pandemia mundial. Pa e mundo di aviacion ta papia riba un normalidad diferente tambe. “Nos por lesa cu ya caba tin diferente decisionnan nobo cu aerolineanan rond mundo ta implementando. Un di nan ta e uso obligatorio di ‘mondkapje’ den avion. Tambe lagando e asiento mei mei habri, aunke mi no ta kere esey lo ta algo cu ta sostenibel pa termino largo. P’ami, e mas importante ta pa purba distancia bo mes mas tanto cu ta posibel di otro hende, locual ta di lamenta ya cu e interaccion cu pasahero ta algo basta comun den nos trabou”. Te ki dia e mes ta ta kere cu e normalidad nobo aki lo por cambia, su pensamento ta uno; “Te cu e dia cu nan ta logra pa haya un vacuna contra Covid-19, te awor e prognostico ta cu esey ta mas o menos fin di aña”.

Pa bo ta locual nos ta yama ‘current on type’, dus pa bo ta cumpli cu tur rekisito pa bo mag di bula, un piloto mester cumpli cu sierto exigencianan. Entre otro un sierto cantidad di ‘take off and landings’ den e ultimo 90 dianan pa duna un ehempel. Unabes cu bo no ta cumpli mas cu e rekisitonan aki, bo mester bay bek den simulator y haci un entrenamento den locual bo ta cubri tur locual bo falta. Esey tambe ta algo cu ta trece gasto adicional pa un compania.

“Riba termino cortico e cambio mas prominente lo ta cuponan di trabou cu lo bay perdi rond mundo den aviacion. Un gran cantidad di avion lo keda retira for di e flotanan di companianan cu consecuencia cu lo tin companianan cu lo bati bancarota. Mientrastanto cu no tin un vacuna pa Covid-19, aeropuertonan y aerolineanan posiblemente lo implementa mas screening/control locual lo por causa mas tardansa y inconveniencia pa e pasahero. Miedo di parti di e pasaheronan pa viaha tambe por contribui na companianan luchando pa yena nan avionnan y asina logra genera suficiente fondo pa sobrevivi. Riba termino largo, unabes Covid 19 ta bou di control mi ta sigur cu cos lo drecha bek y normalisa aunke e ta bay tuma tempo pa tur e daño cu e virus a haci por keda recupera bek…posiblemente algun aña.

Hopi biaha pa mesun trankilidad, nos como humano mester por pone nos mirada riba un lus na horizonte. Pa Raoul, esaki no ta diferente. “Te cu aworaki nos compania te spera di por cuminsa opera bek na Juni manera mi por a lesa tambe den noticia. Claramente esey ta depende riba hopi factor y kico gobierno lo dicidi si habri frontera si of no y mas importante si e pasaheronan tin e gana di cuminsa viaha bek. Mi ta spera si cu e lo no tuma mucho mas tempo pasobra mi tin basta gana di cuminsa traha bek”.