Piloto Johen Croes

Despues di a dedica su mes na su estudio pa 4 aña na Lake Land, Florida, Johen (44) a caba su estudio como piloto na 1998. Su prome trabou tabata cu Air Aruba, unda el a keda pa 2 aña, te na momento cu e aerolinea a bati bancarota. Esaki tabata e prome momento cu Johen a realisa cu pa sigui traha den su ramo di estudio, e mester a pone su mirada pa posibilidadnan pafor di Aruba. “Mi a aplica na Sweden, na Nordic Air unda mi a traha pa 2 aña”. Di eynan, Johen su trayectoria cu varios aerolineanan a continua. Di aerolineanan manera Star Air na Indonesia, Orion Air na Myanmar, Eva Air na Taiwan y awor ultimo, cu Korean air cu kende e ta trahando cunan p’e ultimo 13 añanan den su 22 aña di carera.

Johen ta corda cu apenas 2020 a habri cu e compania pa cual e ta trahando p’e a cuminsa aplica medidanan di seguridad nobo manera ‘mondkapjes’ durante trabou, pero asina mes e no a pensa cu esaki lo bay afecta su trabou como piloto. Sinembargo dos luna despues, su panorama a cambia completamente ora cu el a bolbe Aruba pa vakantie na Maart. E virus a yega Aruba y hunto cune, frontera sera. “Na mes momento e situacion a escala mundialmente y mi a haya un mail di Korean Air informandomi cu pilotonan extranhero (expats) tin cu bay riba ‘leave without pay’ pa 3 luna.  Esaki tabata 9 di Maart 2020. Continuamente e compania ta manda e-mail y tene nos, e pilotonan informa di e situacion y di nos status laboral”.

“E noticia tabata di spera, pasobra tempo di Sars un situacion similar a pasa na Asia. Cual a pone aviacion cay hopi, pero danki Dios esaki no a plama cual e biaha aki si ta e caso. E cambio grandi ta cu mi ta na Aruba pa 2 luna cual ta nice, pasobra normalmente mi ta 12 dia pa luna so na Aruba”. Johen ta bisa, apesar di e incertidumbre e ta keda positivo y ta spera cu e fecha pa bay traha bek cu lo ta prome di Juli, 2020, keda vigente.

“Ora di bay bek South Korea, mi lo mester pasa den trainingnan necesario pa ta cualifica atrobe pa pilotea un avion. Si mi bay pa mas cu 90 dia sin haci 3 take offs and landings, lo mi mester haci un simulator sessions pa get current. Y si mi bay pa mas cu 6 luna sin bula, lo mi mester haci un training di nobo pa custumbra cu e avion. E training aki ta consisti di groundschool pa paar di dia, emergency training, joined crm (crew resource management training),4 sesion di simulator di 4 ora y despues un PC (pilot check). Mi ta kere cu otro cambionan cu e situashon aki lo trece tambe lo ta cu proceduranan di check-in lo bira mas extensivo pa adapta na e crisis actual. Mescos cu e check-in y control a cambia despues di 9/11. Awor atrobe lo bin yen di cambionan cual lo bira e normal nobo y mi ta pre-mira cu esaki lo keda pa un tempo largo. Ami ta calcula 1 aña.

Mi ta kere cu aeropuertonan lo bay haci ‘temperature test’, lo pidi un carta di dokter cu bo ta covid negative, mondkapjes y ‘on the spot testing’ cu resultadonan mas liher. Lo concentra riba online check-in, pa preveni contacto cu otro hende. Social distancing den rij y nos lo siña biba cune, tumando medidanan preventivo pa cuida te ora cu nan descubri un vacuna of nos haya heard immunity”.