Covid-19 a yega pa cambia bida di tur hende. No ta importa ken bo ta of den ki ramo bo ta traha, e cambio tabata sigura. Pa Elite Productions, como compania di entretenimiento, lus, sonido y tecnologia visual cu ta existi pa 13 aña caba, nan tabata sa cu desde e prome cancelacionnan a cuminsa drenta, nan trabounan lo paralisa completamente.
Sin concierto, conferencia of eventonan corporativo di hotelnan y comercio local pa atende cune, diripiente nan a haya nan mes cu nan warehouse yen cu tur nan ekiponan pa warda bek. “Aki ta unda nos a cuminsa pensa kico pa haci. Hunto cu nos coleganan, nos a cuminsa tene sesionnan pa analisa kico nos ta bay haci y asina e ‘brainstorming’ a cuminsa hunto. Nos a pensa cu nos tin bon ekiponan disponibel, pues cu mester tin un forma pa toch usa esakinan durante e crisis aki y eventualmente duna bek na tur esunnan cu ta na cas” Queeny Bergen di Elite ta bisa.
Asina LIVE SESSIONS by ELITE a nace cu lo bira un programa cu lo trece musiconan local dunando presentacionnan durante un ora completo na tur hende via transmishon riba media social y television. Den partnership cu Tele-Aruba, e programa aki lo pasa via facebook page di Elite y via canal 13 y 23, cuminsando diadomingo 26 di April 2020. E orario lo a di 5:30 te cu 6:30 di atardi, manera un ‘happy hour event’ pa tur hende.
Esnan cu scohe pa sigui e programa aki via facebook page di Elite por interactua cu comentarionan, pues e programa lo ta LIVE. E posibilidad pa mira esaki na mes momento via Tele-Aruba ta duna un posibilidad pa e audiencia cu ta prefera e transmishon di e forma aki, sigui e programa tambe.
“Ta ken no ta gusta musica, musica ta uni hopi hende semper y na mes momento ta relaha bo mente, locual ta bonbini durante e tempo aki tambe. Tur siman lo tin generonan diferente, di reggae pa pop, ritmo combina y asina por sigui, pues e variacion lo ta constante”. E set-up di e programa, cual ta den e warehouse di ELITE mes lo conta cu tur regla aplica pa e distanciamento social, pues seguridad ta keda prioridad na tur momento.
Bo ta invita pa LIVE SESSIONS by ELITE desde e siman aki caba.
Siguinan via https://www.facebook.com/elitearuba/
