Desde entrada di Evelyn Wever Croes den politica di Aruba na 2009, el a haya su mes confronta cu diferente ‘batayanan’ chikito pa enfrenta. A tum’e tempo pa cuminsa na aplica su mesun estilo, haya su zona di comodidad y comproba cu e ta den politica tumando su mesun decisionnan basa riba su capacidad propio y cune, haya e aprobacion tambe di sosten pa e carera nobo den su bida. Den su prome salida como candidato riba lista di MEP na 2009, Evelyn a haya 1621 voto di sosten. Un sosten cu a bay ta creciendo y a keda materialisa ora cu na 2011, el a postula su mes como candidato pa liderasgo di partido MEP y a logra esaki tambe y asina a bira e prome hende muher liderando e partido geel, despues di Betico Croes (qpd) y Nelson Oduber. Ya pa e siguiente eleccion na 2013, como lider di e partido, el a logra 3396 voto y na 2017, Partido MEP a drenta gobernashon hunto cu partidonan POR y RED, haciendo Evelyn Wever Croes, e prome Minister Presidente muher pa Aruba.
Unavez den gobernashon, Evelyn Wever Croes a haya Aruba, como un isla cu retonan financiero grandi, pa cuminsa maneha. Cu cada eleccion y awor sinta como lider maximo di un pais, por a mira Evelyn c’un asercamento mas y mas na e comunidad, buscando e coneccion crucial ey. E aumento den atencion, compara cu prome, den su contacto cu e comunidad a cuminsa resalta pero, pa fastioso cu e ta pa bisa, ta durante e crisis sigur mas grandi cu Aruba a haya su mes aden, cual ta e pandemia di e virus di Covid-19, cu Evelyn a cuminsa briya. E crisis aki a duna Evelyn e atencion y escenario primordial pa e por a cuminsa demostra su abilidadnan pa lidera un comunidad realmente.
COVID-19
Tin un frase di uso hopi frecuente cu ta referi na liderasgo cu ta bisa cu e velocidad di un lider ta refleha den e velocidad di su team. E comportamento di e lider ta determina tambe su efectividad den maneho di esnan rond di dje, principalmente ora ta den awanan turbulento. E ta comproba cu lidernan cu ta mustra señalnan di panico of miedo, lo no por mantene nan team uni. Cu e pandemia di Covid-19 un realidad pa mundo, pues pa Aruba tambe, a haci cu nos isla a haya nos mes confronta cu, te awe, e situashon di mas dificil pa enfrenta den historia di nos existencia. Un virus cu a pone Aruba sera su frontera pa su entrada principal-turismo, un economia awor condena, un comunidad den panico c’un inseguridad inevitabel, problemanan social acumulando, pero tur c’un muher na cabes.
Den tur e chaos aki, Evelyn Wever Croes a demostra te cu awor, e calmo cu mester pa rema den e awanan turbulento aki. Un calmo cu a, di un forma of otro, conecta e lider di partido MEP, manera nunca promer, cu e comunidad di Aruba. Evelyn ta refleha un persona completamente den control di su mes. El a demostra compashon y realmente, un speransa, credibilidad y confiansa cu politiconan ta desea pa posee pa crece riba e tereno aki. Pero awor e parti mas fuerte ta bin cual ta materialisa e calmo aki cu hechonan solido sacando Aruba door di e crisis aki, den un forma husto, corecto y transparente.
OPORTUNIDAD PA RENACE
E ta inevitabel pa no puntra nos mes, kico e crisis aki kier siña nos. Esaki por ta un momento pa renace y cuminsa di nobo? Ta ken no lo tuma e chens aki pa haci tal, pero e ta rekeri tambe cu lo mester laga den pasado custumbernan cu nos tabatin cu no tabata mucho bon, por ehempel den mesun gobernacion.
E brote mundial di Covid-19, awe cu mas di 1 miyon caso mundialmente, a trece cune un oportunidad unico pa trece cambio real paso mundo lo cambia y lo ta diferente despues di e crisis aki sigur. No tin duda cu e liderasgo cu Evelyn Wever Croes ta mustrando den locual ta e crisis di salud ta hopi bon pero, e test mes ta na caminda.
Si su vision, conviccion, sinceridad, transpariencia, sensacion y finalmente accion husto keda intacto y exitosamente aplica, e ora nos por bisa cu Evelyn Wever Croes lo a marca su nomber den historia politico di Aruba como un otro gran lider, den e tempo di mas dificil di nos existencia te cu awor. Historia mes lo percura pa revela sumes pasobra, awor e retonan mas grandi mes ta bay cuminsa…
