Como famia y yiunan di e fayecido, nos ta haya ta importante pa rectifica loke enberdad a sosode dialuna anochi na Sero Pita. Mirando cu diferente medianan di prensa a pone nan version. Awe nos como famia di e fayecido y cu tabata presente na e suceso kier a aclaria loke ta ser specula of/y bisa cu no ta cuadra cu e berdad.
Loke a pasa ta lo siguiente :
Pa mas o menos 10:00 pm nos a yama polis pa asistencia pa papia cu nos tata cu tabata bou di influencia di alcohol. E yamada tabata pa please bin Sero Pita paso nos tata tabata fastioso y birando agresivo verbalmente na cas. Niun momento nos tata tabata destruyendo cosnan den cas manera vocero policial a duna di conoce den su entrevista.
Pa mas o menos 10:10 pm polisnan a presenta na nos cas, pa ser exacto 2 unidad di polis cual 4 polis a yega hunto (1 patruya di auto y 1 dog catcher)
E polisnan a drenta nos cas for di porta di sala, den sala nan a topa cu nos mama sinta, nos mama a cana bay cu e polisnan patras den porch area unda cu nan camber ta situa. Nos tata tabata den camber na e momento ey ta wak TV.
E 3 polis a drenta den camber, 1 a keda para na e porta. Nan a pidi nos tata pa lanta for di cama pa nan papia pafo. Wilson a puntranan: Kico boso ta haci kiden? E 3 polisnan a keda insisti pa e lanta pa nan bay papia pafo cu Wilson. Wilson finalmente a lanta foi cama y e polisnan a sali for di e camber pa atende cu Wilson.
Na niun momento Wilson no a sali foi e camber y stap pafor den e area di porch. Tur e momento el a keda para na su porta di camber. Polisnan a pidie pa bira pa nan bay cune warda. Eynan Wilson a nenga rotundamente y a bisa cu e no lo bira pa nan bay cu ne. Finalmente despues cu polisnan a keda insisti, Wilson a bisa nan di warda un rato pa e bisti su tshirt. Eynan ta na unda cu di biaha un di e polisnan a grite y bise: ‘NO’ bo ta keda eynan. Pero toch, como Wilson tabata para den su porta di camber, el a bira y cera e porta di biaha. Bandi e porta paden e tabatin e boter di Old Parr cu e tabata bebiendo di tempran. Ora cu el a sinti e polisnan ta bati y pusha na e porta pa drenta e camber pa sake afor ta caminda cu Wilson a kibra e boter y a keda cu e pida di e boca di e boter kibra den su man. Para dilanti su porta di camber pa ser exacto 10:14 pm 5 tiro a sali tras di otro sin ningun advertencia y sin ningun palabra cu polis por a dirigi na dje! Pues niun momento Wilson haya chens pa ataca e polisnan manera vocero policial a indica.
E tironan cu a cai tabata di 2 diferente polis, di e 5 tironan e resultado tabata fatal hasta mortal, di su bariga bin ariba. Tur esaki a sosode den presencia di su 2 yiunan y casa cu tambe por a wordo alcansa.
Na mes un momento cu Wilson a wordo tira el a cai abou. Eynan ta momento cu un yiu homber a grita e polis: Kico bo ta haci, dicon bo ta tire? E yiu homber a mishi cu schouder di e polis pe stop di tira!
Eynan e polis a punta e pistol riba e yiu homber tambe, na direccion di su bariga. E polis tabata tembla y e tabata hopi spanta. Sin sa kico pa haci. E yiunan a cuminsa grita pa yama ambulans.
E polisnan presente no a yama ambulance prome pero mas bien nan a yama pidi refuerso! Niun momento nan no a core pidi pa ambulance manera vocero policial a menciona den su entrevista na e lugar di e suceso.
Como un ciudadano di nos isla Aruba como famia nos a compara e cuerpo di antes cu e cuerpo di awo. Tin un difirencia! Hasta den e comunidad di antes cu esun di awo.
– Na ki momento un Polis ta yega na e derecho pa kita un ser humano su bida? Ki ora si?Ki ora no?
– Despues di 4 dia ainda nos como famia no tin contesta na nos preguntanan haci!
– Ki dia nos lo tende y of lesa e declaracionnan haci door di e polis nan?
– Ainda nos como famia no por dispidi di nos tata pa asina e por bay sosega na paz.
– Kico ta ser haci pa un departamento asina importante di nos Isla Aruba y cu unda e pueblo ta depende completamente di un cuerpo policial pa para banda di e pueblo pa defende, cuida y protega nos den cualkier situacion. Ora algo asina presenta na ki momento bo por uza bo arma di candela si e otro persona no tin igual? Nos tin un maneho y of structura cu ta bisa prome stap 1 despues stap 2 y si no logra stap 3 y tira? Nos famia ta desea un splicacion y un aclaracion riba e uzo di arma di candela disproporcional manera nan ta bisa pa nan defensa propio of ora nan sinti nan mes di a wordo ‘menasa’ pa nos tata!
– Ki dia nos lo haya husticia?
Famianan di e fayecido.
