Ningun hende por a anticipa e alcance cu e virus lo tin riba mundo, nos a move rapidamente for di ‘keda cas, lockdown, toque de queda y shelter in place’. Ta un tempo dificil pa tur hende, sin duda y pa Susan Ruiter, propietario di Aruba Experience Café & Patisserie no ta un exepcion.
COVID-19
“Mi mester confesa cu mi a haya un MELT DOWN. Na maart, mi mester a tuma e dificil decision di cera nos portanan. Despues di esey ta manera un roller coaster. Mi a pensa cu e tabata sinti straño y loco pa considera pa cera nos portanan, door cu ta un negoshi cu apenas tin 1 aña y 7 luna. Pero e realidad ta cu no ta importa si ta un restaurant cu ta habri pa 22 aña of 22 dia, e situacion tabata cu nos mester a crea distancia social pa por evita cu e virus a sigui plama. Esaki tabata e unico opcion pa proteha mi clientenan, mi empleadonan, mi negoshi y mi mes.
No ta asina cu mi no kier a cera e portanan pero mi tabata wanta na algo. Kizas na e esfuerso, e soño, e placa, e voluntad pa risca tur cos pa crea un producto, un servicio cu tabata asina cerca pa wordo ‘demolish’ door di e condicion deplorabel cu e tabata aden na e momento cu mi a dicidi pa desaroya e idea aki. Den 1 aña y 7 luna di operacion, e tempo inverti pa corehi cada eror, pa mehora, cambia y pa actualisa e procesonan pa asina por keda competitivo… Bo ta hold on to effort, dedication and hope.”
OPORTUNIDAD
“Riba dia 26 di April, e dia unda cu nos queridisimo Padu Lampe lo a cumpli su 100 aña si e lo tabata na bida, mi a pasa den un proceso di reflexion cu a yudami. E tabata un recordatorio di continuidad y creacion harmonioso. Mi tabata bishit’e pa conversa cune y mi a corda cu e tabata un creador, Padu a participa y tabata testigo di e desaroyonan historico di Aruba.
E evolucion di e industria di turismo, Status Aparte, e yegada y cambio di e refinerianan, gobiernonan nobo, hende cu logronan grandi den nan bida y cu a contribui nos progreso. Ey nos tabata, Padu y ami. E a dunami su bendicion y ami, ansioso pa ta parti di e grupo di hende cu lo agrega valor na e prosperidad di nos isla. E potret aki a bin den un notification den mi celular y honestamente e tabata un boost pa mi alma. Mi tabatin mester un recordatorio di e comienso pa logra un RESET.”
Cu e mentalidad nobo aki, Aruba Experience a habri su portanan dia 28 di April, for di 8 am te cu 3pm ofreciendo takeout unicamente. Y pa ora nan por ricibi nan clientenan di nobo, nan lo aplica tur e rekisitonan pa cumpli cu e medidanan di social distancing (6 pia entre cada mesa).
MENSAHE
Normalmente mi ta un persona positivo y optimista, pero e biaha aki e situacion ta rekeri pa nos ta realista. Mi a sinti hopi vulnerabel y pa casi un luna mi no por a lanta cabes, y esey tambe ta okay. Tur hende ta pasando door di e mesun situacion y nos mester procesa tur cos prome cu nos por avanza. Mi ta CLA. Nos lo cuminsa di nobo un biaha mas, pa asina nos por contribui cu e prosperidad di Aruba.
