E dia cu tur cos a cambia: Ronchi De Cuba

Ta exactamente 31 aña pasa (1989) cu Ronchi de Cuba a drenta e mundo cu a marca su nomber na Aruba, moda.

Despues di a studia fashion design na Merca el a cuminsa cu su prome trabounan. “Na 2004 mi a cambia e concepto di mi fashion view pa TRASH store mirando un necesidad pa versatilidad di estilo y prijs como tambe variedad di size y gusto”.

Cu habrimento di aña, Ronchi ta corda cu e prome reportahenan cu a cuminsa sali for di China riba un virus a capta su atencion. Mescos tabata ora informenan a extende riba e brote cu a sigui plama pa otro paisnan Asiatico y Europa. “Mi a pensa cu e lo ta algo manera e SARS Virus di 2003”. Pero asina mes, Ronchi ta admiti cu e no a pensa asina leu cu esaki lo por yega na afecta Aruba ni su negoshi di e forma actual.

“Mi a corda riba SARS cu tabata mas peligroso cu Covid-19 pero no mes contagioso. Mi ta kere mayoria di mundo no a spera cu esaki lo ta e pandemia nobo”.

Pero pa Maart 2020, ora cu gobierno a anuncia e 2 prome casonan pa Aruba, Ronchi a realisa e seriedad y risico pa Aruba. “E siman prome caba tabatin rumornan cu e virus a yega Aruba y por a ripara bentanan a cuminsa baha”.

Un siman despues cu e dos prome casonan di Covid-19 a bira conocir, Ronchi a sera portanan di su negoshi. Tabata dificil pero na lugar di yora y lamenta, Ronchi a tene su mes na su fe. “Mi no a yora. Mi a resa hopi y ta resa hopi ainda. Mi a tene un reunion cu e  ekipo di TRASH y a splica nan di e situacion. Nan ta keda cobra nan salario, te caminda cu nos por y mi a manda nan online courses pa nan tin un mihor ‘skill-set’ di moda y servicio na cliente pa ora nos habri bek. Mi ta haya hopi falta di mi trabou y e parti di socialisa cu mi clientenan pero mi ta compronde cu pa nos supera esaki, nos mester sacrifica un poco. Dia 19 di Maart 2020 tabata mi ultimo dia di operations pero mi trabou ta sigui ‘online’ locual ta den preparacion”.

“Logicamente lo tin cambionan. E futuro inmediato lo ta fragil economicamente y socialmente. Frontera sera lo continua afectando nos fuente principal di entrada y mi no ta mira esaki ta habri pronto (mirando e situacion global).  Cambionan sigur mester tuma lugar den negoshi caminda cu operations lo ta na un minimum expense y trim gastonan no necesario pa por keda habri”.

“MI Fe den DIOS ta semper. Mi ta kere cu e situacion a siñami aprecia bida mas.

Cuida naturalesa mas.  E ta mustra humanidad cu nos no ta manda mundo y cu nos mester respeta bida y naturalesa.  Nos mester pone bienestar di e ser humano prome cu materialismo. E situashon aki ta siñami kico berdaderamente ta importante den bida y kico no.

Na mi cas nos a implemente un regla di “no visitors”. Un miembro di famia so ta haci compra un biaha pa siman.  Mi a meet cu e staff di cas p’asina informa di tur e peligernan di contagio y tin un procedura di desinfecta diario. Di un principio mi tabata hopi preocupa pa nos grandinan.  Mi tin mama, tanta- y omonan di edad halto y mi ta preocupa pa nan.  Mi kier pone enfasis si cu Covid-19 no solamente ta afecta hende grandi.  Un pensamento fout cu ta anda den comunidad.  Covid-19 ta afecta TUR hende.  Jong te menos jong por wordo infecta y por muri”.

Riba e disturbionan cu a tuma lugar na Aruba durante e ‘shelter in place’ unda algun personanan a lanta y duna resistencia na polis ta algo incomprendibel pa Ronchi. “Esakinan ta “alien” pa mi persona. Mi no ta compronde kico un hende ta pensa ora e dicidi di haci esakinan.  E ta un actitud hopi destructivo.  Mi ta kere e mensahe a yega tur caminda na Aruba pero tin hende ta “kies” pa no haci caso”.

“E mihor tip ta pa keda trankilo. Nos antepasadonan a wordo pidi pa bay guera…nos ta wordo pidi pa solamente keda cas.  Locual ta yudami hopi ta pa mi purba mantene mi schedule diario.  Mi ta purba di educa mi mes mas via online courses, haci trabounan na cas, planifica pa ora nos re-open, ta catch up cu movies y tv shows, etc.  Ta importante pa bo mantene bo mes bezig na cas.  Bin cu proyectonan pa drecha rond di cas.  Hopi importante tambe ta pa keda den contacto cu famia y amistadnan. Un yamada ta yuda hopi”.

“Tuma e tempo aki pa restructura. Pensa ki futuro bo kier pa bo mes y/of pa bo negoshi. Cuminsa planea y mira con bo ta mantene finanza pa e proximo 2 of 3 lunanan.  No desespera pasobra esaki no ta yuda cu nada.  Semper tin solucion.  Fe den DIOS semper na prome luga. Reflexiona riba bo bida. Bo tin hopi tempo awor y drecha locual bo no ta gusta y re-enforza locual ta hacibo un mihor ser humano.  “We need to be BETTER PEOPLE after this” – Ronchi De Cuba.