El a lanta den un famia unda tur miembro ta envolvi den e sector medico, di su tata cu ta un Pediatra pa su mama un Bacterioloog y su rumannan tambe medico. Pues e pasion di Dhristi (33) pa scoge medicina como su profesion, no tabata nada straño. E mes ta corda con como mucha su pasatempo faborito tabata hunga dokter. P’esey despues di a caba Colegio Arubano, Dhristi a sondea e posibilidad pa cuminsa cu su estudio den medicina mesora.
BEK NA CAS
Manera hopi studiantenan di medicina, Dhristi tambe su meta tabata pa caba cu su estudio y bin aporta bek na su isla natal. Ora el a bolbe bek cas, tabatin e factor cu studiantenan cu no tabatin e registracion BIG di Hulanda, no por a eherce e funcion medico na Aruba, apesar di ta yiu di tera. Ademas ora Dhristi a bolbe tabata cu e impresion cu tabatin un trabou p’e caba, cu a keda ofreci na dje.
Sinembargo e relidad tabata otro. Esaki a haci cu e no por a haci e trabou como dokter di cas na Aruba manera e lo tabata desea. Aunke desapunta, Dhristy a tuma un posicion como consehero medico cual el a haci desde 2018 cu hopi smaak, te ora e oportunidad di Arubig a presenta y a habri un porta di posibilidad pa haci. Finalmente dia 18 di October 2021, Dhristi a keda anuncia como e prome yiu di tera cu a studia medicina den region, cu a logra completa e registro di Arubig exitosamente.
No mucho despues, Dhristi a cuminsa eherce e funcion cu asina tanto el a soña cune como mucha, den su mesun praktijk awor como dokter di cas.
