E tres productornan di ‘Dios su tempo’

Levy Geerman: Esaki a forma den un manera sumamente bunita y cu Dios su tempo. Jeon y mi persona ta traha hopi hunto pero esaki ta e prome biaha cu su talento, cual mi tin un admiracion grandi p’e, a topa cu mi manera di expresa.

Nos cada un tabata trahando riba nos proyecto di nos curason pa pueblo separa ( sin sa di otro kico cada un tabata trahando riba dje). Mi deadline cu mi a pone pa mi mes pa keda cla cu e produccion y lansa e video tabata 6 di April.

Jeon tabata sinti cu algo ta bise pa e mandami e cantica cu e tabatin traha hopi dia caba. Na momento cu el a mandami esaki, mi ta kere mi por papia pa nos tur dos ….kippenvel. Sin sa di otro pero na e momento perfecto e dos proyectonan a ‘merge’ y bini hunto p’asina pueblo nunca lubida cu esaki ta Dios su tempo y cu hunto nos lo supera esaki.

Jeon & T-Drick: Dios a conectanos pa traha esaki, nos cada un na cas pero conecta pa ‘Dios su tempo’.

Mi gusta scirbi y comparti pensamentonan pa laga nos reflexiona un rato y ta eynan inspiracion a drentami pa captura momentonan cu nunca nos no mester lubida. Kico tur e ta nifica y alavez pa nos tene nos fe den Dios. Di e forma aki mi a gara mi equiponan y filma y bula drone mas hopi cu ta posibel pa capta momentonan historico. Na momento cu mi a tende cu ‘Shelter in Place’ lo bay na vigor, mi a intensiva mi filmacionnan. Mi ultimo imagennan mi a captura 8:15 di anochi pa yega cas prome cu 9’or pa e cuminsamento di e ‘Toke de Queda’ y  ‘Shelter in Place’ bay na vigor.

Di mi banda  mi por comparti cu ami mescos cu full Aruba a keda toca di un manera of otro den e crisis aki. Mi sa cu ainda nos no a pasa completamente door  di dje y cu ainda falta pero cu Dios su poder ora nos sali di e crisis aki, nos lo siña hopi. Mi mes como persona nunca lo kier lubida kico tur e crisis aki a siñami. Esaki ta Dios su tempo