Daha Evertsz, un otro dia sin mi mama

30 September, 2019

"Mami wak mi"

Hopi biaha bo ta tende expresionnan cu no tin dolor mas grandi pa un mama cu dera su yiu. Sin kita e realidad di esaki, e dolor di un yiu pa dera su mama no ta menos tampoco. Na vispera di celebracion di dia di mama, por conclui cu no ta tur hende ta wardando anciosamente pa e dia aki. Daha ta un di nan. E aña ‘ki lo haci 4 aña caba di fayecimento di su mama Genevieve Evertsz y haciendo e entrevista aki, tur e momentonan ta bolbe bek manera tabata ayera den Daha su mente, esun bunita, doloroso y e ultimonan tambe.

Un dushi mama

“Un momento cu semper mi ta corda di mi mama ta ora e tabata caba di haci su makeup mainta trempan. E tabata un persona cu semper tabata smile y su proceso di makiya su mes mainta tabata di sinta riba cama, cruza su pia, y semper na final e ta pone su lipstick y pretende cu e ta bai sunchi e spiel den su man. Mi tabata gusta wak e momentonan aki pasobra e tabata haci’e asina espontaneo”, Daha ta cuminsa conta cordando e momentonan bunita di su mama, ainda saludabel. Su mama a lant’e como un mama soltera y pa Daha, su mama tabata e mihor mama di mundo. “Mi ta kere te cu e dia di awe, tur hende cu a conoce mi mama lo conta con inmensamente alegre e tabata. Su ‘glow’ tabata asina positivo y su mirada ora e tabata wakbo, tabata ponebo smile bek na dje. Su caracter tabata hopi bubbly, a little flirt’ pasobra di un manera of otro e por a persuadi hende sumamente facil. Di dje, mi a hereda su habito di ta ‘a bit of workaholic y early sleeper’”.

Ora tur cos a cambia

“Mi mama a bira malo un dia prome cu mi cumpleaño. Mi ta corda cu mi a haya permiso di hospital pa pasa henter e dia ey cune. Mi a cumpra un bolo y un regalo p’e. Tur aña mi tabata dune un regalo riba mi cumpleaño pa bise danki pa “push me out”. E dia aki drumi band’i dje riba cama di hospital, nos a graba un ‘last girls video’ hunto. Te cu dia di awe mi no a logra haya e forsa pa por wak e video aki pero cu tempo, mi sa cu mi lo logr’e”. Daha su mama a haya cancer na pecho. Esaki lamentabelmente a plama pa su pulmon y a pone cu e mester a depende di tanki pa hala rosea pa un tempo cual despues di tratamento cu esaki a keda cura, toch e cancer a plama pa su cabes locual a haci su condicion terminal. Daha te awe no por lubida e momento preciso aki. “E momento cu mi mama a admiti cu e no ta mira sumes ta bay biba mucho largo mas, ta algo cu te dia di awe mi ta purba di no pensa hopi riba dje pasobra su cara y e expresion ey tabata uno pa kibra bo alma. Nos dos so tabata sinta riba sofa despues cu dokter a duna nos e noticia y e tabata yora asina hopi. E tabata mustra asina chikito den mi brasa. El a bisami cu e tabatin miedo di muri y e no tabata cla pa bay ainda. Esey tabata e momento cu nos tabata sa cu nos no lo tin hopi momentonan mas cu otro. Ni ami cu semper tabatin un cara fuerte pa cu su malesa no por a wanta e dolor ni sconde e realidad mas”, Daha ta conta. “E temporada cumi mama tabata malo tabata e peor momentonan di mi bida, mi tabatin un miedo di e facor ‘tempo’. Nunca mi a experiencia e enfermedad aki den nos famia ni tampoco morto. Pa por a wak mi mama cambia di un muher sumamente fuerte, alegre cu no tabata stop di move rond pa un persona cu a keda lunanan na cama, tabata sumamente dificil. Dokternan a duna su mama rond di un aña di bida. El a logra yega te cu 11 luna y a fayece dia 14 november 2013, cu apenas 49 aña.

E ultimo rosea

“Nos a dicidi pa accepta un counselor pa bin serca mi mama na cas kende a yuda mi mama a ‘open’ hopi mas pa por accepta su enfermedad y unda nos a siña di ta mas habri cu nos famia tambe. E ultimo dianan, mi mama tabata lucha hopi pa e por keda bij pa comprondemi ora mi tabata papia cune. E tabata yamami ‘baby’ for di tempo mi tabata chikito, sin importa si tabata den publico cual nunca mi no a worry paso mi tabata haye lief. Pero e tabata yamami “mom” tambe ora e tabata kier a pidimi algo of kier a tentami door di mi caracter. Te dia di awe mi por corda con su stem tabata zona ora e tabata yamami asina. Mi tabata yore asina hopi y bise cu mi no lo por sin dje. E no por a wak mi mucho bon mas pero e tabata bisami “Oh mom you will be fine, I am proud”. Di e ultimo 11 lunanan di e enfermedad di su mama, e ultimo momento di dje na bida tabata sigur esun di mas duro pa Daha. “Mi ta corda cu su ultimo siman mi tabata drumi bandi dje riba su cama special. E dia final, mi a spierta rond di 4:30 di madruga pasobra e tabata sodando. Mi a lanta di e cama y mi a bise cu su man ta soda cu mi lo bay drumi riba e otro cama. Mi a lanta cana bai drumi na otro cama y mi a sera mi wowo pero ni un minuut despues mi a spierta y lanta pasobra mi a realisa cu mi mama nunca ta soda na su mannan asina. Mi a bay controle y mi a wak cu su rosea tabata straño. Mi tabata sa cu algo tabata malo. Mi a yama un di e zusternan cu tabata yudando nos cu bishita na cas. Ora el a yega, el a bisami cu ‘esaki tabata e momento’. Nos tur dos a cuminsa yora. Mi a sali bay pafor den sala, mi a yama mi oma na Corsow pa bis’e. Mi a yama mi famia y sernan keri na Aruba tambe y nan tur a bin. Mi ta corda cu mi a keda sinta pafor sin por a move mi curpa. Mi pareha a bin buscami na e momento final y e ora a pidi tur hende pa sali for di e camber pa mi por a keda mi so cune. Eynan mi a bise tur cos cu mi tabata sinti p’e y mi a bise cu tabata okay pa laga los. Mi a papia cu mi mama casi 5 minuut. El a fayece hunto cu mi man wanta…

Bibando sin mi mama

Despues di cualkier evento, bon of malo, bida ta simplemente continua. Daha mester a realisa cu esaki no ta diferente p’e apesar di e buraco grandi cu a keda den su curason cu morto di su mama. “Mi ta sinti su falta tur ora di cada dia. Pero loke ta mas duro ta momentonan manera ora algo bon ta pasa cumi manera ora mi a gana scholarship pa studia ma Hulanda, ora Universidad a hacimi e cara di e scol, ora cu mi cara a aparece pa prome biaha den un pelicula local y hasta e momento aki awor, di por haci un entrevista den su nomber y mi no tin e p’ami por bise “Mommy wakmi”. P’ami tur logro lo ta ‘100x better’ si e lo tabata t’ey hunto cumi. Sigur e tabata dificil pa por cuminsa e ‘dia a dia’ sintiendo c’un parti di bo no t’ey mas. Cu tempo mi a bin ta distrae mi mes cu hopi lesamento, cual ta un hobby cu mi mama tabatin y for di chikito mi tabata haci hunto cune. Mi ta mantene mi mes enfoca den mi trabou, mi estudio y mi sernan keri. Semper tin momentonan cu bo ta sinti un soledad cu ta bin ‘overwacht’ of porta algo ta causa esaki manera, un cantica, un lugar of ora mi ta core den auto mi so. Semper su cara ta bin den mi mente. Cu tempo mi ta bin balora cu cada un di e momentonan aki cu e aparece, ta un chens pa mi refleha con mi bida tabata cune aden”.

Si bo mama tabata na bida awe, cual lo ta e preguntanan cu lo bo tin p’e?

“Mi tin asina hopi pregunta na dje pero mi lo ta felis cu tres. Mami bo curason ta felis unda cu mami ta? Mami lo por sigui cana e stapnan cu mi falta ainda pa tuma hunto cumi? Mami, bo lo por please bishitami bek den mi soñonan?…

Mi ta kere te cu te dia di awe, tur hende cu a conoce mi mama lo conta con inmensamente alegre e tabata

Con pa continua

“Semper ora mi tuma un decision, mi ta puntra mi mes kico mi mama lo bisami, su manera di pensa y kico su comentario lo tabata p’ami. E tabata un persona cu ta motivabo masha hopi mes y cu e fuente aki, mi ta sigi pusha pa cu mi carera profesional y estudio. Tur dia mi ta sintimi orguyoso di ta su yiu. Su amor tabata algo cu a hacimi fuerte pa por sigui bay dilanti cu mi plannan den bida. El a lucha asina hopi p’ami como unico mayor y mi a siña respeta con fuerte un hende muher por ta, danki na dje. Mi tin mi famia na Corsow cu kendenan mi ta hopi pega. Mi ta papia cu mi oma masha hopi mes y mi tantanan y tambe mi famianan na Aruba. Mi tin un ‘amazing support group’ den mi dos mama Mireille y su casa Ron, mi closest friends di scol Tracey, Dalgis, Nicholle y loved ones na Aruba y afor cu nunca ta lagami na caya.

Mi pareha na e momento cu mi mama a fayece, su mayornan y full su famia a para fuerte cumi. Mi mama su amistadnan cu el a conoce danki na Wilhemina Kanker Fonds, Mary Joan Foundation, Grupo Siss y su coleganan na Creative semper a keda cumi te dia di awe. Na Joanne nos counselor, nos team di zusternan di cuido na cas. Mi grupo t’asina hopi pa menciona. Danki nan tur cu ni un momento mi no ta sintimi mi so, mi tin hopi suerte di conoce asina hopi hende cu amor pa otro”.

Dia di mama

“E dia aki na cuminsamento mi tabata purba evita tur promocion di dje y hasta tende e palabra ‘mama’ na radio of television tabata causami dolor. Pero mi a siña recorda e dia aki door di honra e fecha. Mi ta bishita mi mama semper pa cualkier excusa; pa dia di mama, dia di tata, valentines, pasco, mi cumpleaño, si mi ta celebra of mi ta djis haya su falta. Mi ta percura pa mi bay semper cu su cosnan favorito, un carta y eynan mi ta sinta papia cune. Dia di mama semper ta y lo keda algo dificil pa un persona sin su mama, pero mi ta orguyoso di por a biba tanto aña cu e amor di mi mama y eseynan nunca lo mi lubida. Su imagen p’ami ta semper den mi mente y curason. Su alegria, su actitud, e nivel di ‘hyper’ cu e tabatin tabata hopi contagioso. E tabata un persona hopi ‘friendly’ y te dia di awe ora un hende reconocemi semper nan ta bisa “Bo ta Jenny su yiu. Bo mama tabata hopi dibo so”. Mi famia ta papia hopi di dje. Na personanan cu no a conoce, semper mi ta open pa contanan di dje. Ta danki na dje mi ta e persona cu mi ta na awo. Tur cos ta danki na mi mama”.

Lesnan valioso cu ta keda atras

E proceso di a perde mi mama na quart di mi bida a ponemi balora hopi den e relacion cu mi tin cu otro personanan. Mi a siña di no ta importa si bo perde un hende awe, mañan of aki 10 aña, semper tratanan cu amor, honor y respet. Mi mama semper tabata sa cu ami no tabata mustra interes den crea un famia. Mi ta kere cu esaki ta choice cu cada persona y pareha ta comunica desde cuminsamento, pero esaki mi lo keda cune habri te ora cu mi ta sinti cu mi ta cla pa tuma e etapa aki den mi bida. Pero mi lo crea un famia hunto cu mi pareha den e mesun disciplina cu mi mama a criami cune. Mi mama semper tabata kier mi sigui move padilanti. Nos tabatin un plan pa futuro y mi ta planea pa sigui cu esakinan. Nos enfoke tabata pa sigui cu mi carera profesional, viaha, conoce otro cultura y siña stima otro ser humanonan cu no tin nada pa dunabo. Mi mama tabata un boluntario, e tabata gusta yuda hende y vooral bestia. El a siñami cu trata otro hende bon awe pa bo por ta un memoria bunita den nan bida. Y e tabatin rason, pasobra esey ta loke e ta den esun dimi; un bunita memoria”.

Conseho

“Si bo no ta pega cu bo mama, tuma e tempo pa conose otro. Introduci bo mes y conte ken abo ta como persona y lag’e splicabo tambe ken e ta. E nucleo entre bo mama cubo, no tin nada cu por compara di con serca dos ser humano por ta desde bo creacion. Pa esnan cu a perde nan mama, tuma tempo pa corda ken e tabata, purba di siña y usa tur e les y experiencianan cu bo tabatin den bo tempo cune. E balor di un mama ta abo so por dun’e.

ESTUDIO: Graduando cu degree Social Work and Development, BA (prepara pa por sigui cu masters den Social Policy na september 2017 na Hulanda) 

HOBBY: Lesa buki, deporte, capture picturesque moments, 

MOTTO IN LIFE Be gentle with the earth by Dalai Lama. Esaki p’ami ta trece dilanti pa semper tin compasion pa otro hende, bestia y pensamento. Di siña respeta y lucha pa igualdad sin haci daño. 

ROL MODEL: Mi mama

Cover

amor, Aruba, Dia di mama, xclusivo