XCL: • Ki tipo di trabou bo tabata haci prome cu e crisis?
Mi ta ‘chef de partie’ na un di e hotelnan mas prestigioso na Aruba.
XCL: Kico a bira bo situacion di trabou despues di e crisis?
Covid -19 a trece un paro na tur locual ta relaciona cu turismo. Poco poco nos a cuminsa wak cambionan drastico ta tuma luga den nos pilar economico mas grandi cu ta turismo. Asina mes nos a mantene nos operacion impecabel brindando lo mihor te na nos ultimo huespede. Despues nos a cuminsa cu e limpiesa y e ceramento di nos cushina. E compania riba su mes a keda calmo y a mantene un energia positivo pa e futuro di e compania y e economia. Nan tabata tene nos na altura di tur locual tabata sucediendo te ora cu a yega na un paro total. Na cas y agradecido cu ta cu pago, mi tabatin hopi tempo liber y mi tabata decidido di siña algo nobo. Mi a purba “coding” durante mi segundo les mi a dicidi di explora un caminda cu tin mas nificacion. E pasion a lanta pa cuminsa planta berdura y fruta premirando cu e benida di e crisis lo trece hopi cambio y cu un dia Aruba lo por sufri di falta di cuminda nutritivo teniendo na cuenta cu gran parti ta wordo importa.
XCL: Con Chubato farm a cuminsa?
Tur cos a cuminsa cumi mes. Gran parti di e inspiracion a cuminsa c’un combersacion cumi tabatin cumi tata. Mi tabata kier a haci algo di cual mi pueblo y mi isla lo beneficia. Cu permiso dimi tata mi a cuminsa haci nos cunucu limpi. Dos siman despues nos tabatin un espacio cla pa cuminsa cu e plantacion.
A bin cu un plan unda ta bay cosecha berdura y fruta, e idea ta pa bende direct na e consumidor ofreciendo e producto mas natural y fresco posibel. Y si nos nota cu no tin demanda pa e producto nos lo procesa esaki den un di nos juicenan. Asina nada no ta bay perdi.
E punto di enfoke no ta e produccion di juice. Den cunucu nos tin matanan di tamarijn di cual fruta ta cai y daña of ta bira cuminda pa fruminga. E ora nos a dicidi cu tanten cu nos ta warda nos matanan crece y cu e plantacion ta cla pa wordo cosecha nos por cuminsa na traha juice cu locual cu nos tin. Y asina e plantacion ta genera un ganashi mientrastanto cu ta wardando riba e cosecha cual ta e enfoke primordial. Pero mirando cu tin un demanda bastante grandi pa e juice nan, nos lo sigi explora esaki.
XCL: Kico bo inversion pa cuminsa tabata?
Hopi perseverancia y un presupuesto hopi abou. Locual nos a usa mastanto tabata palo cu a wordo re-uza y cosnan cu nos tabatin cu nos no tabata haci uzo di dje manera materialnan di construccion, waya cu ta wordo uza pa traha cas di galiña etc. Y un donacion generoso di famia y amistades di simiya pa planta berdura y fruta. E unico cos cu nos mester a inverti den dje pa locual cu ta e plantacion ta e tubo di irigacion y e lona pa duna sombra. Locual cu ta diseño y logo esaki mi mes a crea. A purba di haci tur cos mas bou di presupuesto cu ta posibel y na un forma simpel pa cuminsa haci’e vision cumi tin realidad. Nos ta continua cu e mentalidad aki pa logra nos obhetivo.
XCL: Pakico e nomber Chubato?
Chubato, ta un palabra crioyo. Un exprecion cu mi a lanta cune den mi generacion. Mane Rubiano mi kier mira mas di nos papiamento uza den e sentido aki. Simbolicamente e ta representa e cayente di nos solo, y den tur e calor di e clima un chubato por preserva. Chubato farm ta apela na e estilo di pensamento aki.
XCL: Con e proceso di traha e juicenan ta cuminsa y termina?
*Esnan cu ta piki e fruta (hand picked)
*E proceso di limpia e frutanan y selecta
*Purifica e boternan
*Hydrata y consentra
*Fria y control di calidad
*Emboteya.
XCL: • Ki ingredientenan boso ta usa y cuanto sabor tin te cu awor?
E idea ta pa mantene tur cos mas simpel natural y fresco cu ta posibel.
Actualmente nos ta produciendo dos sabor cual ta juice di tamarijn y di lamunchi.
XCL: E interes pa e productonan y mas sabornan t’ey, manera kico?
Tin un interes hopi grandi pa cu e producto local, nos kier enfoca hopi riba cosecha local, kizas mas den futuro nos lo kier bin cu un healthy blend pa e persona nan cu un healthy life style cu e cosecha cu nos lo logra cultiva riba e farm. Pero enfoke ta keda e parti fresco y sin preservativo.Aworaki nos ta bezig cu e sabornan tradicional di Aruba. Manera nos sa antes tamarijn tabata un di e juicenan cu nos grandinan tabata adora y bebe, despues di aña hopi hende no a sigui cune.
Hopi palo di tamarijn te dia di awe ta duna fruta, y eta tristo pa wak c’un producto cu nos tin liber na nos alcanse nos no ta haci nada cune pero ora cu mester di dje nos ta cumpre y nos sa cu mastanto e ora e producto a wordo importa.
Si tin un interes mas grandi pa sabornan nobo, entre otro un juice di aloe fresco, casho, sorsaka, mango….Nos ta trahando pa introduci sabornan nobo, tradicional, y kisas tambe un mezcla di sabornan natural.
XCL: E boternan ta un diseño propio?
E labelnan riba nos boternan ta un diseño propio.. tur nos labelnan ta handcrafted, nos ta traha tur nos labelnan na man, nos no ta uza machine.
XCL: Con e proceso di emboteya e boternan ta tuma lugar?
Nan ta wordo emboteya na man. Na prome luga nos ta haci e superficie limpi na unda tur e productonan ta wordo poni. Y aunke e boternan ta nobo nos ta labanan un biaha mas. E parti sanitario ta sumamente importante pami y como cumi ta un chef e parti di un luga di traha limpi ta parti dimi estilo di bida y sumamente importante pa locual ta hygiene pa e producto final.
Asina cu e boter wordo seya e ta bay dibiaha den cooler pa keda mantene e temperatura friu constantemente.Tur juice ta wordo entrega friu y ta recomenda pa bebe friu tambe. E juice ta fresco y no tin preservativo den dje ta recomenda pa warde te un maximo di cinco dia.
XCL: Tin juicenan pa personanan diabetic?
Pasobra cu nos ta un negoshi chikito y tambe pa rason cu nos ta traha juice fresco, nos tin e flexibilidad pa por ofrece nos consumidornan diabetico nos juicenan sin sucu segun pedido.
XCL: Unda bo kier yega cu Chubato farms?
E idea ta cu mañan nos por ofrece e consumidor productonan cu normalmente ta wordo cumpra di afo cu awo por wordo haya aki mes riba nos dushi isla y cu ta mas beneficioso pa e consumidor su salud y pa nos economia. Nos tin di purba di tur forma pa yuda nos economia pe por sigui crece specialmente den e temporada aki. Nos deseo ta pa crea oportunidadnan di trabou cu por yuda esnan den necesidad y tambe esnan cu ta pasa trabou pa por haya un trabou. Mi ta desea di encurasha bo persona cu si bo tin acceso na un mata di tamarijn, cosecha e fruta na su bon momento, trece serca nos y nos lo pagabo pe. Por tuma contact cu nos via nos pagina di facebook Chubato Farm.
XCL: Conseho na otro hende cu tambe ta pensa pa bin cu algo durante e crisis aki?
Mi ta recomenda pa cuminsa cu e material cubo tin, locual abo tin acceso na dje y locual cu abo ta gusta haci cu lo por genera finanzas. Crea algo cu e consumidor y bo pais por beneficia di dje y cu tin un demanda pe. Corda cu cuminsa algo nobo semper ta rekeri hopi trabou pero kere den bo mes y sibo ta gusta loke bo ta haci niun dia lo sinti manera cu bo ta traha. Y abo mester haci e trabou niun hende lo haci e trabou mes duru manera abo ni ta kere den bo producto manera abo. Bo pasion mes pabo producto lo contagia bo trahadornan pa nan tambe duna nan miho. Bo negoshi ta bo responsabilidad esey ta algo cumi mayornan a lanta nos cune. Y no warda riba niun hende pa haci bo un fabor of pa yuda bo. Si bo tin un idea bay pe y trahando duro bo lo logra haci bo vision un realidad. Y mantene simpel esey ta un conseho cu mi a ricibi dimi tata. Y por ultimo e ta bo responsabilidad pa carga bo pasion pa logra bo vision. Tur cos ta posibel tanten cu bo kere den bo mes y den bo habilidadnan.
