E anuncio di apertura di Universal Studios Florida, Universal’s Island of Adventure y Universal’s Volcano Bay ta oficial. E fecha cu lo habri porta ta dia 5 di Juni pero ta avisa caba cu e apertura aki lo bin cu reglanan estricto cu tur hende lo tin cu atene su mes na dje. Pues tur bishitantenan di e parkenan lo tin cu sigui cu e guia di CDC ( Central for Disease Control and Prevention) y recomendacionnan di oficialnan di salud como tambe reglanan di e propio Universal Orlando mes.
Ta recomenda pa personanan di riesgo halto evita na bishita e parke. Universal Studio a informa tambe di lo tin reglanan nobo estricto pa su mesun personal y riba mantencion di hygiena na e parkenan mes.
Aparte di e reglanan Universal su management ta agrega un nota cu e ta importante pa tene na cuenta si cu tur caminda unda tin aglomeracion di hende lo presenta e riesgo inevitabel di por keda exponi na COVID-19 durante bo bishita na e parke.
Algun di e reglanan ta:
Tur hende mester bisti un mask
Control di temperatura
Laba man frecuentemente
Distanciamento social di 2 meter
Mester para riba e señalnan marca riba vloer
Evita contacto cu hende malo
Uza hand sanitizer
Sigui instruccionnan di personal di e parke
Universal Orlando y Walt Disney World a sera su portanan despues di nan operacion e anochi di 15 di Maart, 2020. E ticketnan cu a keda cancela durante e periodo aki cu a sera lo ta valido pa 1 aña. Pero si bo no por bishita e parke den e 1 aña stipula, lo ta pemiti pa uza e valor di e ticket no usa, riba e compra di un ticket nobo den futuro.
