Maya & Shinton

Nan ta e pareha di momento, constantemente den spotlight mirando cu ambos ta forma parti di e frontline di e banda Tsunami. Cada un tin nan mesun fanaticadanan pero realidad ta cu ambos ta e fanatico mas grandi di otro. 2019 a bira un aña importante pa e pareha cantante aki ora cu riba celebracion di nan 5 aniversario, Shinton a ‘pop the question’ y Maya a bisa SI.

Maya (36) a nace na Venezuela y a yega Aruba cu 7 aña. “For di chikito mi mester a siña idiomanan nobo cual ta Papiamento y Hulandes esey tabata nobo p’ami. Mi hogar tabata semper hopi humilde pero si hopi ‘supportive’ pa cu otro. Mi tin un ruman muher y dos ruman homber cu mi a lanta ta cuida, manera un mama hopi biaha. Semper nos mayornan tabata kere den nos y semper tabatin musica den cas. Mi tata tabata un hende cu tabata gusta canta y e ta esun cu a introduci mi ruman cumi den musica. Semper musica tabata den nos hogar”.

Shinton (29) ta naci na Corsow pero como baby el a bin biba na Aruba. “Mi ta Arubiano di parti mama y tata c’un ruman so di 1 aña y 2 luna mas grandi cumi. Mi a lanta den un hogar hopi uni y yena cu amor. Mi ruman cumi a lanta ta wak con hopi nos tata ta stima nos mama dus mi ta kere esey tin un influecia hopi grandi riba nos pa con nos a lanta cu respet y un curason fini. Ta e curason fini ey a ponemi cay pa Maya y cu mi ta mal pega manera un crazy glue. Esey tabatin un efecto hopi grandi riba nos p’esey nos a lanta hopi uni como famia te cu e dia di awe ainda nos ta bay come hopi y comparti como famia”.

Maya; “Mi ta kere p’ami ta e manera cu nos tata y mi mama a lanta nos den sentido di ta personanan indenpendiente. Esey ta algo hopi valioso pasobra awendia mi por bisa mi por ta para riba mi pia y mi por haci tur cos riba mi mes. Mi ta agradecido pa musica pasobra musica semper tabata algo cu mi tata a hinka den nos y esey ta algo cu mi ta balora te dia di awe. Danki na esey mi a drenta den e mundo aki, e mundo di musica y cu mi a crece y cu te aworaki na grandi mi ta den dje usando e talento cu mi tin”.

Shinton; “Djis di por tabata den diferente deporte, esun mas principal beisbol. E hecho aki a yudami y siñami hunga manera un team y diciplina. Esey ta e principio mas importante cu te dia di awe tin un efecto grandi riba mi”.

Shinton; “Nos dos a drenta den e banda Tsunami e mesun temporada, Maya a drenta 2 of 3 luna prome y di eynan tur cos a cuminsa cana. Mi ta corda cu e tabatin un cantica cu mi tabata gusta di dje tempo cu e tabata den Touchè, sin sa cu e tabata canta esaki. Mi a namora di su voz prome cu mi a conoce.

Ora mi a drenta Tsunami, nos a cuminsa como colega di banda prome y tiki tiki e amor a cuminsa crece y tur cos a ‘fit den otro’. Ata nos awo 5 aña despues, comprometi y planeando pa casa den un futuro sercano”.

Diferencia di edad entre Maya y Shinton nunca a haci un diferencia pa nan. Shinton; “E diferencia di edad nunca a interveni den nos relacion. Hasta ora nos a cuminsa conoce otro y sigui conoce otro mas, nunca nos tabata sa otro su edad, kiermen esey caba na prome lugar no tabata un issue pa ningun di nos dos. Mas bien nos ta pensa cu edad bo por wak e como madures. Nos ta kere den e etapa cu nos a conoce otro, ambos tabata basta madura caba. E madures semper nos a wake riba e mesun linea. Nos ta igual. Nos dos semper sa kico nos kier y esey a pone nos ‘bond’ hopi mas liher tambe cu otro”.

Shinton ta sigui bisa: “Den tur relacion bo por wak cu tin momentonan bon, momentonan malo, momentonan cu bo ta rabia cu otro manera tur otro relacion. Nos tambe tin biaha ta yega toca cu nos porta a haya un pleito chikito, un ta rabia cu e otro y nos ta haci nos best pa pone esaki un banda tin biaha”. Shinton ta bisa cu e por sconde esaki mihor cu Maya por pero cu nan ta haci nan maximo esfuerso pa semper tene locual ta pasa entre nan, pa nan mes.

“Con cu bay bin, nos ta trahador di un banda y si nos mete nos bida personal den un banda cual mustra cu nos ta rabia, nan ta bay pensa cu esakinan no ta bezig profesionalmente. Esaki ta algo cu nos tin semper presente ora cu nos ta den luz publico y cargando e nomber di Tsunami. Ora nos ta riba escenario nos ta artista pero ora no ta riba caya nos ta pareha, nos ta wanta man, nos ta sunchi manera tur otro pareha. Bo no por limita bo mes.

Na Aruba bo no tin e tiponan di fanaticada cu ta siguibo manera paisnan grandi. Claro cu tin hende cu ta follow nos cu ta gusta nos como artista, esey si. Na Aruba mayoria hende of tur hende sa cu nos ta cu otro como pareha. No ta manera nos kier wanta nos relacion un secreto pero ora nos ta riba escenario, nos ta haci nos trabou mane debe ser”.

E dia cu Shinton a compromete cu Maya tabata uno hopi special mirando cu e dia aki tabata nan di 5 aniversario. Maya ta conta cu e dia aki tabata hopi unico. Shinton a haci esaki hopi unico y hopi simpel. Nos a bay come e dia ey, tabata 7 di november cual nos tabata celebrando 5 aña cu otro como pareha. Despues ora nos a yega cas Shinton tabatin tur cos cla caba prepara cu yudansa di su prima. Despues di esey ora di cana bay direccion sala, Shinton tabata na rudia y e ora el a “pop e question” e tabata un momento hopi special hopi bunita. Nos tur dos a keda sin palabra”.

Shinton ta añadi: “Aunke ami no tabatin pura pa haci e pregunta, mi tabata sa cu manera tur hende muher, Maya tabata soña cu e dia aki. Porfin mi tabata bon financieramente y mi tabata cla pa cumpra ‘e renchi’. Mi a pensa full e dia kico mi lo bise y ora e momento e yega, mi a lubida tur cos”.

Maya a bira hopi emocional, e tabata un sorpresa, e mes no a spera esaki. E momento aki tabata extra special paso nan a comparti esaki den presencia di ambos nan famia, e tabata algo simpel pero hopi bunita. Pa loke ta e dia pa e casamento, ainda no tin un fecha stipula pero un cos ta sigur, e lo ta na Aruba.

“Den mi fantasia lo mi kier a bay casa afor pero como mi famia ta grandi, lo mi kier celebra cu nan y no ta egoista pa celebre leu di nan, mas ainda cu mi abuelonan ta na bida ainda. Nos ta cla pa un famia y ami lo por adjust y haci mi best pa bira e mihor tata posibel.

Mi ta kere cu ora e yiu bin, Maya lo sali di banda pero ami ta mira mi mes ta haci musica pa semper. Casamento lo no cambia nos como pareha”.

“Prome cu tur cos; confiansa pa cu otro. Confiansa pa bo biba mas trankil, esey nos tur dos tin, dus por ehempel si un di nos kier sali cu nos amigonan of famia no ta cuenta di unda e ta bay of kico e lo ta haciendo. Nos ta haya cu si e preocupacion ey bo tine den un relacion, e ora e no ta bon.

Si bo tin e confiansa cu tur cos ta bay ta bon y bo pareha no ta bay haci nada for di sla pa faltabo respet, e ora bo por ta trankil haciendo algo na cas”.

“Respet pa bo mes y pa bo pareha, no ta importa si bo ta banda di dje of bo ta bo so. Como artista tin biaha bo mester anda cu bo fanaticonan cu kizas kier saca potret cu bo pero esey no kiermen cu bo ta falta respet na bo pareha. Tin biaha bo ta haya fanaticonan cu ta un tiki loco pero abo no por yuda den e caso ey, pero toch bo mester mustra respet”.