Un grupo hopi importante den nos comunidad, specialmente durante e pandemia ta nos artistanan. Cu e mundo paralisa den un lock down, nos a conta riba e grupo aki, pa informa nos y inspira y duna nos un speransa por medio di nan trabou. Armando Goedgedrag ta un artista reconoci pa inspira su mes riba nos naturalesa local y durante e periodo aki e tambe a resalta cu su obranan inspira riba Aruba su flora y fauna. Su mensahe sinembargo ta uno cu ta transcende e crisis. Nos naturalesa ta den peliger y mester dun’e su balor y sigui cuid’e, mas cu nunca.
EXITO Y E ROL DI UN ARTISTA
“Personalmente mi a haya tempo pa refleha riba mi trabou y pa wak cua direccion mi lo kier bay”. Psychologicamente e ta sinti cu el a bira mas mindful, algo cu por dunabo paz mental. Esaki a yude hopi durante e pandemia pa por sigui enfoca riba su metanan y cosnan cu e lo kier logra.
Personalmente e ta haya c’un estudio por ta un extra help ora ta trata di profesionalismo. Esaki por yuda e persona bira exitoso ora ta trata di opdracht nan grandi. “Pero banda di estudio mi ta haya c’un persona por yega hopi leu tambe door di keda practica loke e kier bira bon aden”.
Armando ta describi di exito como “ora bo hobby ta bo trabou y cu bo por biba for di dje”. E ta pensa cu e rol di un artista den nos sociedad actual ta uno importante. Paso un artista ta comunica atraves di su vision, su arte cu lo por inspira otro personanan y laga nan wak e fuente di inspiracion den un forma diferente. “Den mi caso e obranan cu mi ta traha ta mastanto pa inspira hendenan pa proteha e bunitesa di Aruba su naturalesa”.
Por lesa mas di Armando su entrevista den nos edicion digital, tanto den Papiamento como na Ingles.
