Bo nunca sa unda destino ta pone bo ancra y forma bo bida. Teddy Bouroncle (41) tabata sa si cu 1 dia e lo tin su mesun restaurant pero cu esaki lo ta na un isla chikito leu di su pais natal Peru yama Aruba, nunca el a imagina.
LIMA BISTRO...SU SOÑO CUMPLI
Teddy ta corda c’un di e cosnan bunita cu Aruba a dune ta amistad di hopi hende. Y tabata precisamente un di e amistadnan aki cu a habri e porta pa un soño di hopi tempo cu e tabatin di tin su mesun restaurant. “Mi a keda ofreci e oportunidad pa habri un restaurant basta grandi na e skina di Harbour House Aruba pero manera cu e pandemia di Covid a cuminsa, e plan pa e proyecto a keda cancela”. El a sigui cu su trabou na Marriott Aruba pero algun luna despues, el a keda aserca atrobe cu e proposicion pa e mesun amigo pa haci un restaurant, pero den un tamaño mas chikito. “Mi a accepta mesora y mi a dicidi pa bay p’e”. Teddy tabata cla pa hinca su alma den su soño y asina Lima Bistro a nace, den pleno pandemia. Construccion a cuminsa na oktober 2020 y na Juli 2021, Lima Bistro a habri su portanan. “Mi no tabata kier un restaurant 100 porciento Peruano.
