Tin biaha bida mes, cu paso di tempo, ta ofrece bo na un manera extraordinario, un forma con pa expresa bo mes y desata bo sentimentonan cu bo tin warda den profundo di bo ser. Apesar di tabata pinta pa hopi tempo caba, Suelyn Koevermans Dankerlui nunca no a realisa su potencial artistico completo te na momento cu el a bira mama y a sinti e necesidad di recobra parti di su identidad personal bek. Ora su yiunan a cuminsa scol, un canvas blanco riba un ezel, un penseel y algun tubo di verf a bira su escape, un parti di dje cu semper tabata tey, pero cu awor e no por pone un banda nunca mas…
“Pa awor mi lo sigui challenge mi mes mas hopi posibel y mi siguiente paso ta pinta riba canvas mas grandi, pero mi lo kier keda disfruta di locual mi ta haciendo”. E ta pensa cu nunca bo mester stop di kere den bo mes y tampoco stop di reta bo mes. “Si bo kier crece den cualkier ramo, yuda bo mes buscando cursonan online, bay workshops y educa bo mes riba diferente area”. Poco poco bo por crea bo mesun style. Keda fiel na bo mesun style, no haci cosnan pa complace hende sino haci locual abo ta sinti y locual abo ta disfruta di haci y e ora hendenan lo sinti esey y apreci’e tambe. “Por ultimo lo mi bisa pa no enfoca mucho riba resultado so, no semper cosnan lo sali mane bo kier, pero si bo a siña di e proceso y bo a disfruta di dje, bo a crece”.
