No ta tur hende tine den nan pa bira un entrepreneur. E ta rekeri un persona cu ta dispuesto pa tuma risico, un persona cu por plan, cu ta creativo, profesional, cu tin conocemento y tambe social. Ademas di esaki e ta rekeri tambe cu bo ta haya e tipo di negoshi cu bo ta completamente natural den dje y cu bo tin un pasion grandi p’e. For di tempo e tabata chikito Mary-Phil tabata sa cu e lo kier bira juffrouw di scol, pero ademas di esaki semper e tabata sa tambe cu e ta gusta haci negoshi. E mucha cu tabata hunga juffrouw y tabata traha cosnan pa bende na cas, a crece, studia un combinacion di tur dos pasion y awendia e ta eherce tur dos banda di otro exitosamente. E no ta imposibel!
HACI BO TRABOU CU PASION
Den e business di events y esta e trendsnan ta cambia constantemente y hopi liher. E parti leuk di esaki ta cu bo por keda haci cosnan diferente y haya inspiracion y ideanan cada biaha di nobo. E parti menos leuk ta cu e inversion cada biaha ta grandi y e no tin fin. Pa bo ta un profesional of un entrepreneur exitoso e ta rekeri pa bo keda bo mes, keda cu gana di siña cosnan nobo, ta dispuesto pa siña otronan, tuma feedback, acepta setbacks y keda constantemente traha pa logra locual bo kier yega na dje. “Mi ta kere e parti mas importante di un negoshi ta cu bo mester gusta locual bo ta haci, paso e ta hopi trabou y sacrificio y si e no ta algo cu bo ta gusta y tin pasion pe, e por ta algo negativo enves di positivo den bo bida”.
