Algun di e cosnan positivo durante Covid-19

Apesar di e situacion cu nos ta bibando awor na Aruba semper tin algo positivo cu lo pasa. Esaki ta algun di nan:

Esaki tabata 28 di Maart 2020, net e dia cu Jeon mester tabatin su concierto den Renaissance Convention Center pero pa motibo di Covid-19, esaki a keda cancela. Pero Jeon no a laga esaki strobe y hunto cu T-Drick riba piano, e duo a deleita fanaticonan di islanan ABC c’un tremendo concierto via Livestream riba facebook.

Un hoben Arubiano biba na Hulanda, kende a bolbe Aruba y den pleno crisis, a opta pa lora manga y actua, el a  haci entrega di productonan na hendenan grandi cu no por a sali di nan cas. Despues di a presencia diferente caso di famianan cu no tabatin nada pa come, Jean Marc a cuminsa pidi donacion y asina via su grupo Bossi Volunteers a cuminsa haci entrega di paketenan di cuminsa na centenary di famianan rond Aruba.

Nos por bisa cu den e ultimo 9 dianan tabatin solamente 5 caso positivo registra, pues esaki sigur ta algo bon cu ta pasando comparando cu e crecemento di caso nan 2 siman pasa. Nos ta haciendo nos esfuerso como un comunidad pa Flatten e curve cu pasonan sigur.

Un alivio pa hopi hende cu por asina haya nan producto/cumindanan, sintiendo mas sigur kedando cas. Normalmente tabata hopi dificil pa nos a haya e tipo di servicio aki pero mirando e situashon di e Shelter in Place debi na e Covid-19, el a bira hasta un di e mihor servicionan cu e companianan aki por brinda na e pueblo di Aruba.

Dokter Choudhry a haya aprobashon y sosten pa por cuminsa haci estudio di transfusion di plasma for di pashentanan cu a recupera di Covid-19 pa pashentnan infecta. Mientras cu e estudio aki ta tumando lugar caba na diferente otro paisnan na mundo manera Merca, Suiza, China y hasta Hulanda, Aruba tambe ta uni su mes na esaki. Esaki ta keda haci na e laboratorio di bloodbank na Aruba.

Mayornan por ta mas tempo awor cu nan yiunan na cas y asina por pasa mas tempo den famia, yuda nan yiunan cu nan lesnan y hunga diferente board games. Board games sigur a bira awor un pasatempo nobo na Aruba bek, unda cu riba social media pa varios dia bo por a wak diferente hende tabata busca esakinan pa cumpra.

Cada biaha cu bo persona cumpra un taco na Craft of na Lola taqueria bo tambe ta yudando c’un donacion na diferente persona cu ta den necesidad den e tempo di crisis aki. E compania hoben aki maneha pa rumannan Neme ta briyando cu nan curason generoso durante e crisis aki.

Diferente hende a cuminsa haya mas interes pa planta diferente tipo di berdura of fruta. Esaki ta un ‘move’ sumamente positivo unda agricultura ta hayando su tarima di importancia y awe por mira su importancia, na momento di crisis. Lugarnan cu ta bende simiya a mira con esakina awor ta desaparece for di shelves indicanco cu e comunidad kier bay bek na loke nos antepasadonan tabata haci.