Durante siman a cuminsa circula un potret saca den Gusto di Kevin Wever, yiu di prome minister Evelyn Wever Croes, cu a keda confirma positivo pa Covid-19. E potret tabata principalmente uza como indicacion cu e yiu homber di nos mandatario maximo tambe tabata den Gusto Night Club, cu a keda señala como un di e lugarnan di origen for di cual varios hobennan lo a haya e virus aki cu a plama durante e ultimo dianan. Riba e mesun potret por a mira miss y modelo, Anouk Eman, kende ya na cuminsamento di siman a anuncia caba cu el a sali positivo pa Covid-19 y su pareha Marksonn Maduro, kende ta den cuarentena como medida di precaucion, sugeri pa DVG na tur hende cu a bin den contacto c’un persona positivo pa Covid-19 .
Pero loke kizas hopi hende no a cay riba dje ta e mensahe cu e potret aki ta duna, mas aleu di e contagio di dos persona y unda nan ta. E potret aki ta mustra union entre varios hobennan, apesar di nan background politico.
Kevin, yiu homber di nos prome minister y su pareha ta sali riba e potret hunto cu Marksonn Maduro kende tabata candidato di hubentud riba lista di partido AVP na 2017 y Anouk Eman, subrina di lider di partido AVP, Mike Eman. Pues hobennan cu comodamente por ta amigo, apesar di e ambito politico cu nan a lanta aden of ta kere aden. Un simpel mensahe di union.
Gobierno di Aruba actualmente ta den retonan grandi c’un pandemia cu nunca a pre-mira, un discusion fuerte cu Hulanda pa haya fondonan pa sobrepasa momentonan dificil cu nos economia ta enfrentando y un impasse den un partido di coalishon cu tur consecuencianan negativo y inseguridad cu esaki por trece cune. Un siman atras ex-lider di partido MEP, Nelson Oduber a scirbi riba su pagina di facebook cu kizas e momento a yega pa e 2 partidonan di mas grandi, AVP y MEP evalua pa traha hunto; “Lo no ta facil, pero cuminsa crea e ambiente, duna otro e espacio pa purba compronde otro mihor y ban baha man un tiki di tira otro cu skop, lastra otro. C’un tiki mas respet pa otro pa un dia boso lo por sinta hunto“. Di otro banda e lider actual y Prome Minister Evelyn Wever Croes a bisa algun dianan pasa cu e.o. “traha cu partido AVP no ta riba mi lista”.
Bayendo bek na e potret ya comparti riba medianan social, no tin duda cu esaki ta mustra un diferente generacion y un pensamento nobo. Otro aña lo ta eleccion y lo ta interesante pa mira con e comunidad di Aruba lo bay responde y si loke e potret aki ta mustra awe, lo manifesta tambe den e mandato di un comunidad, den forma algun.
