XCL: Con bo(so) cada un su schedule/rutina tabata prome cu Covid-19?
Nos schedule y rutina tabata hopi mas druk cu awo, hopi mas meeting en persona, bay radio y television.
XCL: Ki dia abo a cuminsa realisa cu Covid-19 lo afecta Aruba y cune, bo trabou?
For di dia cu nos Prome Minister a anuncia e prome caso tur cos a cambia di e dia ey pa awor. Nos a realisa for di e momento ey cu nada lo ta mescos mas.
XCL: Cua tabata e momento cu a pensa cu mester –ahusta of cambia e concepto di trabou?
Momento cu e casonan tabata bira mas y mas nos mester a adapta meetings den persona y haci tur nos meetings via zoom y purba keda na cas mas tanto cu posibel.
XCL: Con Anything Goes a nace?
Tele Aruba tabatin e show aki den file y esaki tabata e momento oportuno pa trece e show aki riba pantaya. Inicialmente e concepto tabata pa e host ta den studio di Tele Aruba, pero a adapta na e situacion actual cu “social distancing” y TDQ pa motibo di Covid-19.
XCL: Cuanto hende a traha pa haci esaki realidad y kico bo mes mester a haci pa siña of adapta na e forma nobo aki di traha?
Tele- Aruba cu su technologia innovativo a logra cu “remotely” nos ta bay on anochi y cu e empleado di Telearuba no mester ta “on location” na mi cas. Durante e show mi ta presenta e famoso wega “memory” unda televidente via yamada ta hunga y gana premio. Zayon ta presenta cantantenan, cu for di nan cas ta deleita nos televidente cu nan musica. Ta un team grandi ta zorg pa e programa bay on tur anochi.
XCL: Awor ta traha for di cas, con esaki ta p’abo compara cu sali di cas pa bay traha?
E ta algo diferente sigur, mi mester a involucra full mi famia pa yuda durante un show for di mi cas.
XCL: Cua ta e ahustenan cu a haci pa esaki?
E ahustenan di mas grandi ta e parti technico cu Telearuba su team tin na nan encargo. E parti di presentacion practicamente a keda mescos. Duna un curso na mi famia di camera work, producer work, y un tiki di e trabou technico si acaso algo bay robes on location nan por resolve.
XCL: Kico ta meta di e programa?
Anything Goes ta un programa cu un formato hopi casual. E nomber ta papia pa su mes , Anything Goes. E meta ta pa entretene nos televidente cu wega, chiste, video, musica cu cantantenan di Aruba y Internacional. Den e show tin varios segmento manera Rey kik’e ta, unda tambe ta gana premio, famia Anything Goes, keda bo piep na cas, segmento di Social Media etc.
XCL: Con ta sinti e reaccion di e publico/audiencia ta te awor?
Super agradecido cu e acogida y feedback cu nos ta ricibi. Nos tin un audiencia masha grandi mes ta wak nos tur biaha.
XCL: Bo(so) lema ta semper hancra riba positivismo. Con importante esaki ta awor durante e crisis aki?
Pa nos e ta tur cos, semper nos a kere cu positivismo ta secreto di tin un bida exitoso, maske e situacion actual ta fastioso nos ta keda positivo pa por transmiti e positivismo pa nos oyentenan y televidentenan.
XCL: Bo a haya algun resistencia serca hendenan cu kizas no ta mira e meta di e programa aki durante e tempo di crisis aki?
No, Ningun. Alcontrario masha hopi hende ta gradici nos y team di telearuba pa a bin cu un programa asina. Hopi ta bisa e ta kita nan mente for di tur e cosnan cu ta pasando rond.
XCL: Kico bo mensahe ta pa nan?
Masha danki na tur hende pa semper apoya nos y cu fe hunto nos lo sali padilanti.
XCL: Kico ta e les mas valioso cu bo(so) a siña di e crisis aki y el a haci un cambio den bo(so).
Balora e cosnan chikito den bida manera bo libertad, aprecia otro mas, yuda otro mas cu bo por, tin comprencion pa otro.
XCL: Kico boso ta siña di otro, tata pa yiu y yiu pa tata?
Zayon: Mi a siña for di mi tata cu con duro e situacion por bira semper tin un solucion pa tur cos. Lanta traha cu un smile semper.Ivo: Mi a siña di Zayon cu pasenshi bo ta gana hopi mas cu bo ta pensa, e tin hopi mas pasesnshi cu mi.
XCL: E ta great pa traha hunto ainda?
Semper ta great di traha hunto, e ta un bendicion di Dios cu nos ta traha hunto den diferente programa di television y Radio y toch tin estilo diferente.
XCL: Bo(so) consehonan na esnan cu kizas ta hoga den e negativismo cu e crisis aki ta trece cune?
Resa masha hopi mes, nos ta kere den Dios y ta 100% convenci cu tur cos cu nos tin y lo bay tin ta danki na nos fe grandi cu nos tin den Dios. Mi ta conseha tur hende resa hopi y keda cu bo fe intacto. Nos lo sali pronto di e situacion aki.
