E dia cu tur cos a cambia: Lissy lampe

E aña aki Lissy Lampe, un wedding planner lo mester a celebra 15 aña manehando su negoshi, Ceremonies & Celebrations in Aruba. Pero nunca e por a biba pensa cu e prome siman di Maart di e aña aki, lo tabata su ultimo evento, sin sa ki dia e lo por reanuda su trabounan bek.

“Mi a cuminsa na 2005 cu mi negoshi despues cu e compania cu cual mi tabata traha cune a keda bendi. Pues mi a opta pa cuminsa riba mi mes y mi a ‘fall in love’ cu Wedding Planning despues di a traha c’un aerolinea na Merca y aki na Aruba pa un total di 13 aña. Nos ta concentra mas tanto riba bruidnan internacional ya cu local nos ta haci masha poco.  E bruid local mas grandi cu nos a haci tabata na Divi Phoenix mas o menos 2 aña pasa.

Awor na cas, tratando di repasa e cantidad di eventonan cu Lissy a coordina, e ta bisa cu tin 3 cu ta keda bin bek den su mente. “Tur e tres a tuma lugar na un golf course local renombra. Un tabata di e secretaria di e director di Deutsche Bank na NY cu mas di 240 invitado, e otro di un pareha di California cu mas o menos 80 hende y e di 3, e groom tabata un Creative designer na New Jersey mientras e bride tabata un personal trainer. E tabata un evento cu mas o menos 100 invitado. Nan tur tres a bay all out y te awe mi ta den contacto basta estrecho cu nan via facebook y tambe cada vez cu nan bin Aruba.  No ta esunnan cu bay all out so ta memorabel. Hopi di nos parehanan ta sigui bin Aruba y ora nos por, nos ta topa cu nan siquiera pa un koffie. Maske tur mi eventonan ta toca mi curason y cada un ta special riba nan mes, bo tin tambe esunnan di amistadnan of yiunan di amiga/o y eseynan ta claro un sentimento diferente. Tambe tin esnan cu nos a haci nan bruid pa nan y awor ta bolbe y kier renova nan votos nan y nan kier pa nos handle tur cos pa nan atrobe!  Keremi cu cada evento pa nos tin un significacion special.

Lissy ta corda ainda e momento cu el a cuminsa tende di Covid-19, pero no a pone mucho atenshon na esaki;”Ma relate cu Sars, H1N1, y otro tipo di “griep” nan  cuminsamento. Pues mi a keda trankilo y positivo y a pensa cu lo ta algo similar y cu e lo no afecta nos en lo absoluto, mescos cu esnan anterior no a afecta nos. Mi ta kere cu yegando na mitar y pa fin di Februari mi a pensa “oh oh, this is serious”.

Te awe nos a pospone mayoria di nos bruidnan y a haña solamente 3 cancelacion.  E prome cu a cancela tabata locual nos ta yama un “last minute” paso nan tabata aki caba y kier a haci un beach blessing chikito dia 17 di Maart. Sinembargo nos a haya nos ta cancel esaki.  E otro dosnan tabata supposed di haci nan bruid civil solamente na April y nan a opta pa haci esaki na nan pais di origen mes. Un di Hulanda y un di Merca.  Un di e bruidnan di Maart ta bay purba pa Juni 2020. Varios otro a move pa e diferente lunanan di e aña aki ainda entre Augustus y December y un a move pa otro aña Mei 2021. Tin algun cu no sa ainda cual fecha nan lo pone paso nan mester, claro check cu nan guestnan, pero tur nos bruidnan di April y Mei cu excepcion di e 3 nan cu a cancel, a opta pa pospone paso nan KIER bin Aruba!

E ultimo evento pa awor tabata dia 7 di Maart 2020, cual tabata hopi bunita y special. E tabata un “double renewal” di un pareha local y un pareha amigo di nan di New York y nan tur dos a celebra nan di 20 Aniversario.  Mi ta corda con contento nan tur a keda y ta hopi brasamento tabatin pa gradici nos pa e planning y execution di nan “Big day”.

Te awor, sigur mi a yora varios biaha. No p’ami paso mi sa cu si dura 3 luna mes, cual nos ta spera ta menos, nos lo bounce back.  Mi ta yora pa esnan cu no sa si nan lo keda tuma bek na trabou despues di esaki.  Mi ta yora pa e dunado di trabou cu tin bon intencion y lo kier yuda su trahadornan pero cu podise echt no por yudanan.  Y pa esnan cu mester bay traha paso nan ta esnan den e trabounan esencial. Mas cu tur cos mi ta yora paso awoki nos ta ‘machteloos’.  Sigur cu hopi di nos ta spanta tambe pero mi ta kere cu e machteloosheid ta surpasa e miedo.  At least serca mi, e ta asina. Mi a haya un break for di mi institucion bancario. Mi sa cu mi mester spaar esey pa temponan “flaco” cu podise ta na caminda.  Pero mi a opta pa yuda mi 2 empleadonan cu ta traha vast cu algo, maske nos a sera oficina for di dia 17 di Maart 2020, paso nos tur ta den e mesun boto!

Ami ta positivo y mi ta keda cu mi fe! Mi sa cu “no hay mal que dure 100 años ni cuerpo que lo resista” y mi sa tambe cu mayoria di nos hendenan, vooral esunnan den turismo, sa cu ora nos pone schouder hunto na bienestar di nos Dushi Aruba, cu nos lo make e! Turistanan cu ta stima Aruba nan LO bin bek … Algun cu mi ta den contacto cune a bisami cu nan tin miedo cu nan lo no por haña lugar den avion of hotel paso e sa cu hendenan lo flock pa nan “home away from home” asina cu ta posibel! Mas aun, si nos tur hunto haci tur lo posibel pa tene e number di e casonan mas abou posibel, lo nos gana e respet di hopi y esey tambe lo atrae mas hende!

E crisis ta siñandomi hopi cos, pero pa keda cu e parti positivo; E la siñami cu tur hende mester di hende, y cu si bo por haci un hende felis, hacie! Sea agradecido y stima otro. Tambe importante ta cu e la reconfirma pa hopi cu nos TUR ta mescos! Gusta of laga e ta e berdad! El a siñami cu bo mester ta mas flexibel y tambe cu un brasa no ta algo pa ‘take for granted’!! Please shonnan … KEDA CAS!

Nomber completo; Aissa Lissette Lampe (tur hende conocemi como Lissy) 

Nomber di negoshi; Ceremonies & Celebrations in Aruba

 Start date;  December 8, 2005