Na Aruba, Xuxa Evalieht Borges Petit (34) a bira ya un nomber bon conoci den musica. Como DJ, por topa cu Xuxa na varios eventonan di moda, corporativo y priva, unda e parti crucial di musica, ta keda encarga na dje. Aunke su estudio tabata di accounting, realmente, musica tabata semper un parti di su bida. El a cuminsa na Punto Fijo den e mundo aki, pero awendia, marcando su nomber na e isla cu a habri porta p’e, Aruba.
INTRODUCCION NA MUSICA & MIX
Naci na Punto Fijo, Edo. Falcón. Venezuela, Xuxa ta e mas chikito di su famia di cinco otro ruman. “For di mucha semper musica tabata presente den mi bida, mi mama ta gusta musica (salsa mas cu tur) y mi tata tambe. Realmente full mi famia. Ora cu nos tabata reuni na estanan di famia, semper ami tabata pendiente di pone musica pa nos tur baila, mescos tabata na scol, y na universidad cu mi amigonan. Ora mi a bira mayor di edad, mi a cuminsa sali bay nightclubs y eynan mi a cuminsa crea amistadnan cu diferente DJ di e ciudad unda mi a nace”, Xuxa ta conta. “Realmente mi a cuminsa ora mi tabatin 19 aña, pero mi tabata hacie pa mi mes, mi so den mi camber, despues pa mi famia, te c’un dia un amigo cu tabatin un nightclub na Venezuela e tempo ey a duna mi e idea di toca den su negoshi. A presenta e oportunidad, mi a hacie y di berdad e dia ey nunca mi lo lubida”. Eynan ta unda el a cuminsa explora cu musica riba un otro nivel. “Mi a cuminsa wak diferente programanan over di musica te yega na e punto di mix music y siña esaki mi mes.
Na cuminsamento e tabata un poco dificil pa hinca mi mes den e circulo aki, pasobra na Punto Fijo no tabata existi Djane (DJ femenino), pero poco poco mi desenvolvimento tabata papia p’ami como tamb’e mi actitud, te ora cu mi a logra un reaccion positivo cu loke mi tabata haci y hendenan a cuminsa ta mas ‘open’ cumi”.
Como DJ, hopi biaha bo estilo ta keda defini y pa Xuxa esaki no ta diferente. “Mi gusta tur music en general, pero Techno ta esun cu mas mi ta identifica cune! Mi ta kere cu e energia cu bo ta sinti ora bo ta bailando Techno ta UNICO! E ta una manera di ‘detach’ di tur cos…
ARUBA
Na 2016, Xuxa a subi avion rumbo pa Aruba yena cu plan y speransa. E no tabata conoce Aruba pero tur e storianan bunita cu e tabata scucha, a spierta e interes den dje pa conoce.
“Semper mi tabatin e gana di bin Aruba!! Mi a scohe Aruba door cu e ta serca di Venezuela pero tambe pasobra hopi amigonan tabata contami di e energia di e isla. Un dia ma papi’e cu mi mama, mi a prepara mi maletanan y mi a bin Aruba yena cu obhetivo-, y hopi meta pa cumpli. For di e momento cu mi a wak e isla for di e bentana chikito di avion, mi a encanta”.
Y desde cu el a yega Aruba, portanan di diferente radio y negoshinan a habri p’e. Y pa agrega na esaki, el a cuminsa conoce hopi hende y crea amistadnan nobo, cual esunan cu conoce lo bisa cu e no tabata nada dificil p’e. “Esaki ta un di e caracteristicanan cu ta definimi como persona cual ta amigabel”. E amigonan aki a bira su fanaticonan tambe y awendia ta sigui Xuxa via su paginanan di social media. “Mi ta stima tur cu hopi forsa, nan ta mi siguidornan di mas grandi y nan ta esun cu ta inspirami na toca cada dia mihor”.
ESTILO
Su estilo e ta define como un Dj Crossover, pero cu su parti mas fuerte ta keda electronic. Pa loke ta su estilo di bisti, e ta gusta mix y un poco di e mihor estilonan. “Mi gusta glam, vintage, imponente y yamativo.
Mi style ora di bisti ta loke ta identificami y claro dependiendo tambe di e evento, mi ta ahusta mi manera di bisti. “Dj ta di publico y ta nan ta manda”. Xuxa ta mantene su mes ‘updated’ siguiendo e mihor DJnan di mundo. “Nan ta mi role models pa sigui”.
Unda e ta mira sumes den 10 aña?
“Mi ta wak mi mes na Europa, esey ta mi soño. Toca ayanan ta manera un reto pa cualkier Dj, e ta un meta cu casi tur Dj kier cumpli. Mi ta wak mi mes siendo un producer, pero cu famia (ta bisa ta hari) pero si, di berdad mi lo gusta pa ta un producer di musica”.
Aruba ta mi di dos hogar pasobra e ta e unico lugar, aparte di mi prome hogar, cu ta lagami sinti realmente na cas! Na unda tin un parti di mi amigonan, coleganan, te hasta e amor di mi bida, hahaha…
