Luna di Maart ta e luna cu nos ta duna honor na nos identidad, nos cultura, nos Himno y nos Bandera. Cu esaki como punto di salida, e team completo di Xclusivo Magazine, a dicidi pa dedica e edicion di e luna ‘ki na San Nicolas, Aruba su ‘Sunrise City’. A haci entrevista cu diferente personanan cu den nan forma, ta dunando nan aporte na pone luz constante riba San Nicolas. Nan esfuerso, den nan trabou, cada un diferente, ta demostra cu e amor y conviccion pa traha pa yuda San Nicolas lanta bek ta bibo serca su hendenan. Sangernan nobo ta con nos ta yama cada un di e personanan aki cu via nan trabou, sea den horeca, retail, media, deporte of trabou comunitario , ta forma parti di e comunidad cu ta stima San Nicolas.
Riba portada ta figura Vanessa Leer, born and raised in San Nicolas, kende via su trabou como DJ na radio Massive 103.5, ta empower e comunidad pa kere den nan mes y den e potencial pa uni y engrandece San Nicolas. Entrevistanan interesante cu mas di e sangernan nobo aki ta Judrick Gario, cu a crea su mesun marca YIU DI TERA honrando Aruba, Bernadine Akins, continuando cu e legado di su famia cu Grote Berg Snack cu e Johny Cake di mas famoso na Aruba, Nick y Kedesha Gordon cu ta e protagonistanan clave den creacion di Kulture Café, situa den un di e edificionan di mas bunita na San Nicolas cu ta Nicolaas Store, Tabitha Smith-Heemstadt cu su trabou na radio y comunitario ta responsabel pa e sentimiento di Up Town Rising, Alison Williams, propietario di Massive Radio a crea un portal pa celebra e cultura di San Nicolas y Aldrich Briesen cu su pista The Yard pa Bike Cross y Skate boarding ta representa e oportunidad pa muchanan di bario ta hunto den un forma sano. Cada un ta representa un poco di e comunidad cultural y vibrante di San Nicolas.
