Rober Wester a lansa un encuesta riba su plataforma social di facebook pa busca informacion riba e pensamento, percepcion di impacto di turismo LGBT aki na Aruba. E studiante di Hospitality and Tourism Management na Universidad di Aruba su mes, a traha henter su bida den turismo. Ora cu el a bay Hulanda por ehempel, su bijbaantje tabata den Horeca.
PERFIL: “Mi a bai Hulanda pa studia total algo otro: International Communication, pasobra mi no a pensa Hospitality Tourism Industry ta algo pa mi traha den dje tempo completo. Despues di estudio aki mi a cuminsa traha den e comunication industry cual tabata interesante pero mi no tabata sinti mi mes contento. Despues di dos aña mi a dicidi di bai bek den Horeca. Mi a traha den varios hotel, na evenementonan grandi na Hulanda como tambe riba un crusero Aleman. Ora mi a bin bek Aruba 4 aña, pasa mi a tende di e estudio cu Universidad di Aruba ta ofrece. Mi tabata traha templo completo pero mi kier a obtene un ‘degree’ den Hospitality pa agrega na mi experiencia. Awo tres aña despues, mi ta den mi etapa final.
LGBT COMMUNITY : Mi pasion pa Hospitality Industry ta profundo. Mi a crece na Hulanda na unda e LGBT community no ta algo straño. Dus ora mi a bin biba Aruba, mi a ripara cu apesar cu e isla ta ‘Gay Friendly’, hopi hende den mi alrededor directo, tabata keda wak, señala of reclama ora nan ta wak turistanan of local di e comunidad LGBT. Mi mes tambe ta parti di e LGBT community pues p’ami e ta normal pa mi tene man di mi casa of baila cu mi casa ora nos ta na un club of fiesta. Pero te hasta cierto di mi amigonan ta sinti nan mes incomodo ora mi baila cu amigo of ora mi tene man of sunchi mi casa. Ami nunca no a tume personal pasobra mi sa con dificil e por ta pa hende cu no a crese cu esey, pero tambe mi ta un persona cu mi ta kere den ‘if you want to see a change: be the change, Mahatma Gandhi.
LGBT NA ARUBA-BONAIRE-CORSOW: Si nos compara con Aruba, Boneire y Corsow ta deal cu e turismo LGBT mi ta haya cu toch Aruba ta un tiki menos activo. Na Boneire, hendenan di LGBT community por casa, anto ora ami a casa eynan, hendenan tabata hopi ‘supportive’, unda hasta turista y localnan a bin saca potret y tabata hopi interesa pa sa con e procedura a bay. Boneire no ta promote LGBT Tourism pero si e ta un lugar unda nos di LGBT community por bay y haci e union cu esun cu bo stima oficial. Na Aruba y Corsow esey no ta posibel ainda lastimamente. Mi ta kere esey lo no bai pasa p’awor tampoco. Tambe Corsow ta habri riba di LGBT tourism, nan tin nan yearly gay pride, cual hopi di mi amigo y conocirnan ta bay tur aña, pa ta parti di esey.
Den mi junior year di estudio mi tabata duda kico mi topico lo bai ta di mi thesis pero mi tabata sa cu mi kier a haci algo pa haya e comunidad enbes di concentra riba e turistanan. Anto aangezien LGBT ta parti di mi tambe, mi kier a combina esaki. Despues di hopi discusion, mi a dicidi cu mi kier sa kico e percepcion ta di e pueblo di Aruba riba e diferente impactonan di LGBT Tourism. Aruba no ta enfoca hopi riba e ‘target market’ aki pasobra otro mercado ta super bon y fuerte pa Aruba por ehempel Wedding Industry, Music Industry, Green Tourism y Wellness Tourism. Anto why change a winning team right? Aruba Tourism Authority tin su Niche department anto nan sa bon kico nan ta haci anto nan ta deal cu esey super bon. Pero ami kier a dig deeper into the potential di LGBT tourism, ami ta kere personalmente cu mas por keda haci den e area aki anto cu e por ta un mercado beneficial pa e economia di Aruba.
Mi ta ‘scheduled’ pa gradua otro luna dia 11 di september 2020, mi ta spera di entrega mi thesis cu resultado y tur. Te aworaki mi data collection ta bayendo hopi bon. Mi ta falta si te ainda mas hende homber y hendenan di edadnan 50+ p’asina mi tin un imagen mas representabel di e comunidad di Aruba. Mi lo laga e encuesta habri pa un of dos dia mas p’asina mi por haya mas di e target population aki. Mi ta super contento cu tur e reaccionnan y con hopi y liher hendenan di Aruba ta yena e encuesra. Tambe cu nan ta ‘share’ esaki cu nan hendenan. Mi a pensa dor di e topico hopi hende lo no contesta pero toch mi ta ripara cu hende ta responde liher. Mi ta pidi esnan tambe cu no ta support e turismo aki pa tambe tuma parti na e encuesta aki, pasobra nan opinion tambe ta conta. Mi no kier tin un resultado cu ta bisa ku LGBT Tourism ta welcome anto ora puntje komt bij paaltje tin protesta of hendenan ta negativo riba esaki.
XCLUSIVO ONLINE a combersa cu CEO di ATA, sra Ronella Tjin Asjoe kende a bisa nos cu e comunidad di LGBTY ta un segmento cu nan ta enfoka riba dje, igual algun hotelnan na Aruba tambe. E ta bisa cu hasta lo kier haci mas cu e comunidad aki, manera por ehempel weddings na Aruba, pero esaki awor no ta posibel y no ta den man di ATA pa cambia esaki.
Por tuma parti na e encuesta aki:
Papiamento: https://forms.gle/vgiNSMyjKhX6pw5NA
