Un paso historico ta e forma con varios media Mericano a cataloga e noticia cu a drenta diaranson anochi di e ‘impeachment’ di e di 45 Presidente di Merca. Pa ta exacto, historia ta ripiti pa di tres biaha c’un Presidente Mericano ta keda ‘impeached’- pues acusa oficialmente, den e caso aki pa abuso di poder y obstruccion di congreso. E dos prome Presidentenan cu a keda impeached tabata Presidente Andrew Johnson na 1868 y Presidente Bill Clinton na 1998. Presidente Richard Nixon a retira na 1974 prome cu e proceduranan di impeachmente a yega e cas di representantenan mes. 
Cu e acusacion aki formalmente accepta pa e cas di representantenan domina pa Democratanan, e caso aki pa retira presidente Trump for di su cargo lo tin cu bay Senado unda e mayoria ta den man di Republicanonan manera Trump. Cu e detaye importante aki, expertonan ta bisa cu e ta casi 100% sigur cu Trump lo no keda retira for di su cargo como presidente di Merca, pues cu e lo haya respaldo y proteccion di su cu coleganan Republicano.
E voto pro impeachment di Presidente Donald Trump ta culminacion di un investigacion di no menos cu 3 luna riba acusacionnan cu e Presidente Mericano a presiona Ukraine pa investiga su contrincantenan politico mientras e tabata wanta asistencia di seguridad di parti di Merca na e pais aki, pues pendiente ki informacion e por a haya pa uza den su campaña politico e tempo ey. E cas di representantenan a vota 230-197 pro pa acuse di abuso di poder y 229-198 pro pa obstruccion di sendado
Apesar cu e chens cu Trump lo keda retira di su cargo como Presidente di Merca ta hopi chikito, lo tin cu bay mira ki efecto e impeachment aki lo por tin riba su intencion pa un segundo termino .
