T’Jay Glenn Farro (25) ta bin di e bario di Primavera y a studia na Colegio Arubano y Universidad di Aruba. Inicialmente e ta manera hopi otro hobennan Arubiano, sinembargo, e siman aki el a logra un hazaña cu solamente dos otro yiu di tera a yega di haci prome cune; el a yega na punto di Monte Kilimanjaro na Tanzania, Africa. Xclusivo Online a combersa cune p’asina comparti su experiencia unico.
Trahando pa Grant Thornton, T’Jay tabatin oportunidad di haci estudio na Sur Africa y Alemania pa seis luna cada un. Asina el a namora di e continente Africano y su paisnan. Esey, combina cu e hecho cu for di chikito e ta practica actividad y deportenan extremo, a hib’e na fiha e meta remarcabel aki pa su mes. “E ta gewoon un drive cu mi kier haci cosnan cu ta laga mi curason bati duro,” T’Jay ta confesa.
TRAINING: For di October aña pasa el a duna inicio na su preparacion; algo cu e tabata consciente di mester tuma cu hopi seriedad, ya cu e ta bin for di un isla cu no tin mucho sero. Tene na cuenta cu e punto mas halto di Aruba ta Jamanota na 188 meter halto, mientras cu punta di Monte Kilimanjaro ta na 5.895 meter riba nivel di lama.
Su dianan tabata dedica na practica landamento, core den sero, yoga, bicicleta, bodyboard, triathlon y calisthenics. Fuera di esey, el a busca pa sa kico pa haci p’asina e entrena su resistencia na e efectonan di altura riba bo curpa. “Un cos cu mi a cuminsa tuma hopi na serio ta e nutricion di e curpa paso ora bo train hopi duro tur dia, esaki ta pone bo curpa bou constant stress fisico y mental. E cos di mas importante ta come hopi mas limpi, tuma vitamina y mineral cu por yudami cu recuperacion mas lihe, cu mi por bay cu mi training mas duro”.
Parti di su entrenamento tabata na Aruba mes coriendo den seronan den dia y anochi. T’Jay tabata campa eynan mes pa custumbra di core cu tas pisa riba lomba, drumi y lanta den mondi pa sigui. E ta bisa cu esaki a yud’e hopi. Pa loke ta e costonan financiero di un reto asina, T’Jay ta bisa cu e ta pone e mesun disciplina cu den su entrenamento fisico, dor di spaar y evita cosnan manera salimento y luho.
Apesar di tur e entrenamento y investigacion haci prome, e subimento di Monte Kilimanjaro tabata un reto fisico y mental mas grandi di loke el a spera. El a pasa seis dia canando 100 kilometer durante 6 pa 7 ora pa dia sin stop. T’Jay a experiencia e actividad aki den diferente clima, cada un cu su retonan, for di selva na comienso y despues desierto cu hopi solo y finalmente friu.
Ahusta na e altura ta conoci como un di e obstaculonan mas grandi pa tur hende. T’Jay ta conta cu riba su trip el a presencia dos caso di emergencia caminda mester a evacua hende cu ta biba na e sero dor di a haya problema pa hala rosea of tabatin tosamento cu sanger. “E no ta facil, pero ora bo ta hopi dedica na yega e top eynan, no tin echt nada cu ta bay stop. Bo mester ta suficiente prepara di bo banda,” e ta bisa.
Emocionalmente T’Jay a conta cu e biahe a traha riba dje ora cu pa prome biaha e por a wak for di leu e punto final. “Bo ta wak con grandi y bunita e ta.” E anochi prome cu el a yega na e top, ya caba e tabata na un altura di 4.700 meter y su curpa tabata sinti e efectonan aki. E no por a drumi pasobra cabes tabata bati y casi e no por a hala rosea drechi. Mainta el a lanta trempan pa caba cu e ultimo 6 kilometer di cana, pero segun T’Jay, esey tabata e parti di mas duro. Seis kilometer cu a tum’e 8 ora total pa cana.
“Bo ta bayendo basicamente 90 grado stret halto. Bo mester bay super poco pasobra bo curpa simplemente djis no por bay mas lihe pa via di e altura y cu tur e dolornan den bo curpa: Bo lomba ta dolor pasobra bo tas ta pisa, bo cabes ta bati… Bo dal un stap mucho lihe, bo rosea ta corta full caba!” Ora cu finalmente a yega na e punto di mas halto, a bira hopi emocional. “Den e par di seconde cu bo ta keda eynan, bo ta wak bek na tur bo luna di training hopi serio y tur e effort cu bo a hinca den dje; cu por fin bo ta logra make it. Bo ta na top di e punta mas halto di Africa. E sensacion tabata increibel y el a surpasa mi expectativa. Sigur cu si”.
Den su futuro T’Jay tin awo pa continua cu su studio y obtene su Master’s Degree den Finanzas na Groningen, Hulanda. No ta descarta cu esaki lo ta compaña pa otro aventuranan yena di adrenalina.
- Kilimanjaro ta e punto mas halto di Africa y e montaña ‘free standing’ mas halto na mundo. Cu ‘free standing’ ta referi na un elevacion di tera cu ta su so, y cu no ta forma parti di un serie di varios otro sero banda di otro. Un comparacion local por ta Hooiberg cu ta su so, versus Arikok y Jamanota, etc cu ta banda di otro.
- Calithenics ta un tipo di ehercicio cu ta consisti di un variedad di movecion cu ta ehercita gruponan grandi Musculo dor di entre otro core, para, colga, pusha, etc. E ehercicionan aki hopi biaha ta haci den forma ritmico y cu masha poco ekipo, pero cu bo mesun peso di curpa.
- Unico otro Arubiano cu a yega di na top di Kilimanjaro tabata Kedy Koolman na 1997 y Marlien Colin ana 2010.
Si bo kier sigui T’Jay su aventuranan y wak mas potret di su hazaña na Kilimanjaro, sigui e riba Instagram.
